لاہور( نیوزڈیسک)پاکستان تحریک انصاف کے چیئرمین و قومی کرکٹ ٹیم کے سابق کپتان عمران خان کی زندگی پر بنائی جانے والی پاکستانی فلم ”کپتان“جلد سینما?ں کی زینت بنے گی۔فلم تکمیل کے آخری مراحل میں ہے اوربہت جلد ریلیز کے لیے پیش کردی جائے گی۔فلم میں عمران خان کا کردار ادا کرنے والے اداکار عبدالمنان نے نجی ٹی وی سے گفتگو میں بتایا کہ اگرچہ فلم تکمیل کے قریب تھی تاہم چونکہ عمران خان نے دوبارہ شادی کرلی ہے لہٰذااب فلم میں یہ پہلو بھی شامل کیا جائے گا۔فلم کی مزید تفصیلات بتاتے ہوئے عبدالمنان کا کہنا تھا کہ انہوں نے کپتان بننے کی پوری کوشش کی۔ یہ فلم مکمل طور پر عمران خان کی زندگی پر مشتمل ہے کہ کس طرح انہوں نے کرکٹ کے میدان میں ورلڈ کپ جیتا، پھر کینسر ہسپتال کے لیے ان کی کوششیں اور اب دوسری شادی بھی سکرپٹ کا حصہ ہے۔فلم ”کپتان“میں عبدالمنان نے عمران خان، سعیدہ امتیاز نے جمائما خان، سونیا خان نے عمران خان کی ہمشیرہ اور مہوش ناصر نے بینظیر بھٹو کا کردار ادا کیا ہے۔اگرچہ فلم کا ٹریلر دو سال قبل ریلیز کیا گیا تھا تاہم فلم اب یہ تکمیل کے آخری مراحل میں ہے اور اس میں عمران خان کی زندگی میں ہونے والی بڑی تبدیلی شامل ہونا باقی ہے۔