اسلام آباد(نیوز ڈیسک) پمز اسپتال میں پیش آنے والی آتشزدگی کے المناک واقعے میں جاں بحق ہونے والے نومولود بچوں کی تعداد 15 تک پہنچ گئی ہے،
جبکہ اسپتال انتظامیہ نے جاں بحق بچوں کی میتیں ان کے اہل خانہ کے حوالے کرنے کا عمل شروع کردیا ہے۔نجی ٹی وی کے مطابق اب تک 5 بچوں کی میتیں لواحقین کے سپرد کی جاچکی ہیں۔ دوسری جانب اسپتال کے ریکارڈ کی بنیاد پر حادثے میں جاں بحق ہونے والے بعض بچوں کی شناخت بھی سامنے آگئی ہے۔رپورٹ کے مطابق آگ کی زد میں آکر بہادر نامی شہری کے جڑواں بچے بھی جانبر نہ ہوسکے۔
واقعے کے وقت نرسری میں مجموعی طور پر 16 نومولود زیر علاج تھے، جن میں سے 15 زندگی کی بازی ہار گئے جبکہ ایک بچے کو لیڈی ڈاکٹر نے بحفاظت نکال لیا۔حادثے کے بعد جاں بحق بچوں کی شناخت اور میتوں کی حوالگی کا عمل متعلقہ حکام کی نگرانی میں جاری ہے۔
