اسلام آباد (نیوز ڈیسک) وزیراعظم شہباز شریف اور مسلم لیگ ن کے صدر میاں نواز شریف کے درمیان ہونے والی اہم ملاقات کی تفصیلات سامنے آگئی ہیں،
جس میں مختلف سیاسی اور قانونی امور پر تفصیلی تبادلہ خیال کیا گیا۔
نجی ٹی وی کے مطابق دونوں رہنماؤں کے درمیان تقریباً دو گھنٹے جاری رہنے والی ملاقات میں بانی پی ٹی آئی عمران خان کو اسپتال منتقل کرنے سے متعلق سپریم کورٹ کے فیصلے کو خصوصی اہمیت حاصل رہی۔
ذرائع کا کہنا ہے کہ وزیراعظم شہباز شریف نے نواز شریف کو عمران خان کو شفا انٹرنیشنل اسپتال کے بجائے پمز منتقل کرکے طبی معائنہ کرانے کے فیصلے کی وجوہات سے آگاہ کیا۔
ملاقات کے دوران موجودہ سیاسی صورتحال، آئندہ کی حکمت عملی اور دستیاب قانونی راستوں پر بھی مشاورت کی گئی۔ اس کے علاوہ پی ٹی آئی کی جانب سے دائر کی جانے والی توہینِ عدالت کی درخواست اور حکومت کی جانب سے ممکنہ قانونی جواب کے معاملے پر بھی گفتگو ہوئی۔
ذرائع کے مطابق نواز شریف نے اس موقع پر مؤقف اختیار کیا کہ پاکستان اس وقت کسی نئے سیاسی یا آئینی بحران کا متحمل نہیں ہوسکتا، اس لیے معاملات کو دانش مندی اور سیاسی تدبر کے ساتھ آگے بڑھایا جانا چاہیے۔
دوسری جانب ملاقات میں آزاد کشمیر کے آئندہ وزیراعظم کے انتخاب سے متعلق بھی مختلف ناموں پر غور کیا گیا۔ وزیراعلیٰ پنجاب مریم نواز بھی اس اہم ملاقات میں موجود تھیں۔
