اسلام آباد (نیوز ڈیسک) پاکستانی سیاست میں بعض اعداد محض نمبرز نہیں رہے بلکہ وقت کے ساتھ مخصوص سیاسی حوالوں اور علامتوں کی شکل اختیار کرچکے ہیں۔

ان میں 17 اور 804 بھی نمایاں ہیں، تاہم اب ایک دلچسپ اتفاق نے ان دونوں اعداد کو ایک بار پھر سیاسی بحث کا موضوع بنا دیا ہے۔

تفصیلات کے مطابق بانی پی ٹی آئی عمران خان کی قانونی ٹیم کی جانب سے حکومت کے خلاف سپریم کورٹ میں دائر کی گئی توہینِ عدالت کی درخواست کو ایک ایسا ڈائری نمبر الاٹ ہوا جس میں 17 اور 804 دونوں اعداد ایک ساتھ موجود ہیں۔ عدالت کے متعلقہ شعبے کی جانب سے درخواست وصول کیے جانے کے بعد جاری ہونے والے ڈائری نمبر میں ان دونوں نمبرز کی موجودگی نے سیاسی حلقوں کی توجہ حاصل کرلی۔

سیاسی مبصرین اور سوشل میڈیا صارفین اس اتفاق کو خاصی دلچسپی سے دیکھ رہے ہیں۔ 804 کا ہندسہ عمران خان کی جیل میں شناخت کے حوالے سے ان کے حامیوں میں ایک معروف علامت بن چکا ہے، جبکہ 17 کو 8 فروری 2024 کے عام انتخابات کے تناظر میں ایک مخصوص سیاسی حوالہ حاصل رہا ہے۔

یوں ایک ہی مقدمے کے ڈائری نمبر میں 17 اور 804 کا اکٹھا آنا کئی لوگوں کے لیے غیر معمولی اور دلچسپ اتفاق بن گیا ہے۔ عام طور پر عدالتوں میں روزانہ بڑی تعداد میں مقدمات کے ڈائری نمبرز جاری ہوتے ہیں، تاہم کسی اہم سیاسی شخصیت کے مقدمے میں ایسے اعداد کا یکجا ہونا سیاسی حلقوں میں خاصی توجہ حاصل کر رہا ہے۔

اس اتفاق نے نہ صرف مذکورہ درخواست کو سیاسی طور پر مزید نمایاں کردیا ہے بلکہ سوشل میڈیا پر بھی اس حوالے سے مختلف تبصرے اور قیاس آرائیاں سامنے آ رہی ہیں۔

عظمی خان کی توہین عدالت درخواست کو نمبر الاٹ کر دیا گیا ہے pic.twitter.com/ohsUwIT7hj

— Kamran Khan (@GKamranKhan) August 22, 2026