اسلام آباد (نیوز ڈیسک)عمران خان کا پمز میں طبی معائنہ مکمل، میڈیکل رپورٹ کی تفصیلات جاری نہ کرنے کا فیصلہ بانی پی ٹی آئی عمران خان کے طبی معائنے سے متعلق

پمز اسپتال انتظامیہ نے اعلامیہ جاری کردیا، جس میں کہا گیا ہے کہ ان کی میڈیکل رپورٹ کے تفصیلی مندرجات عوام کے سامنے نہیں لائے جائیں گے۔

پمز انتظامیہ کے مطابق عمران خان کو ماہر ڈاکٹروں کی نگرانی میں طبی معائنے کے لیے اسپتال لایا گیا، جہاں مختلف ٹیسٹ اور طبی جانچ کا عمل مکمل کیا گیا۔ معائنے کے بعد انہیں دوبارہ اڈیالہ جیل منتقل کردیا گیا۔اعلامیے میں بتایا گیا کہ عمران خان کو 20 اور 21 اگست کی درمیانی شب پمز اسپتال منتقل کیا گیا تھا۔ اس دوران شفا انٹرنیشنل اسپتال سے تعلق رکھنے والے دو ماہر امراضِ چشم نے بھی ان کا معائنہ کیا۔

پمز کے ماہر ڈاکٹروں نے بھی بانی پی ٹی آئی کی تفصیلی طبی جانچ کی، جبکہ آنکھوں کے معائنے سے متعلق ماہرین کی رائے کو پمز کے ڈاکٹروں کی مجموعی طبی تشخیص میں شامل کیا گیا۔اسپتال انتظامیہ کے مطابق عمران خان کی طبی حالت اور فٹنس کا جائزہ لینے کے لیے پمز کے ڈاکٹروں پر مشتمل میڈیکل بورڈ نے رپورٹ تیار کی ہے۔

اعلامیے میں واضح کیا گیا ہے کہ سپریم کورٹ کی ہدایات کے باعث عمران خان کی طبی رپورٹ کی تفصیلات یا اس کے مندرجات ظاہر نہیں کیے جاسکتے۔پمز انتظامیہ کا کہنا ہے کہ مریض کی پرائیویسی اور عدالتی احکامات کو مدنظر رکھتے ہوئے میڈیکل رپورٹ کی معلومات کو خفیہ رکھا جائے گا۔