لاہور (نیوز ڈیسک) پنجاب میں تعطیلات کے بعد تعلیمی سرگرمیوں کا دوبارہ آغاز ہوگیا ہے، صوبائی وزیر تعلیم رانا سکندر حیات نے اسکول واپس آنے والے طلبہ کو خوش آمدید کہتے ہوئے نئے اوقات کار کا اعلان کیا ہے۔
تفصیلات کے مطابق پنجاب بھر کے اسکولوں میں پیر سے تدریسی عمل معمول کے مطابق بحال ہوگیا۔ اس موقع پر وزیر تعلیم رانا سکندر حیات نے طلبہ کے نام اپنے پیغام میں کہا کہ چھٹیوں کے بعد بچے نئی توانائی اور جذبے کے ساتھ اپنے تعلیمی سفر کا دوبارہ آغاز کریں۔
صوبائی وزیر تعلیم کا کہنا تھا کہ تعطیلات کے باعث جن بچوں کی پڑھائی متاثر ہوئی، ان کی تعلیمی سرگرمیوں کو دوبارہ معمول پر لانا ضروری ہے۔ انہوں نے کہا کہ بچوں کے اسکول سے باہر رہنے کی شرح میں اضافے کو روکنا حکومت کے لیے ایک اہم چیلنج ہے۔
رانا سکندر حیات کے مطابق صوبے کے تمام اسکولوں کے لیے پیر سے جمعہ تک نئے اوقات کار مقرر کیے گئے ہیں۔ نئے شیڈول کے تحت اسکول صبح 8 بجے سے دوپہر 1 بج کر 30 منٹ تک کھلے رہیں گے۔
صوبائی وزیر نے اس عزم کا اظہار کیا کہ ہر بچے کو تعلیم کے حصول کے لیے اسکول تک پہنچانا صرف حکومت ہی نہیں بلکہ پورے معاشرے کی مشترکہ ذمہ داری ہے۔
