جڑانوالہ (آن لائن)صوبہ کے اکثر شہروں میں گزشتہ ہفتے سے جاری گرمی کی شدت میں روز بروز اضافہ ہو رہا ہے حتیٰ کہ مئی کے وسط میں پڑنے والی مذکورہ شدید ترین گرمی نے پچھلے 30 سال کا ریکارڈ توڑ دیا ہے جس سے طلبا و طالبات سب سے زیادہ متاثر ہونے لگے ہیں لہٰذا والدین نے بچوں کی قیمتی زندگیاں بچانے کیلئے وزیر اعلیٰ پنجاب میاں حمزہ شہباز شریف سے صوبہ بھر کے تعلیمی اداروں میں فوری موسم گرما
کی تعطیلات کا مطالبہ کیا ہے۔ طلبا و طالبات کے والدین نے کہا کہ ایک طرف روزانہ کی بنیاد پر نیشنل ڈیزاسٹر مینجمنٹ سیل، محکمہ موسمیات اور محکمہ صحت سخت ترین ایڈوائزریاں جاری کر رہا ہے اور لوگوں کو ہیٹ سٹروک، لو اور شدید گرمی سے بچنے کیلئے دوپہر تک کے اوقات کے دوران گھروں میں رہنے اور حفاظتی و تدارکی اقدامات پر عمل کی ہدایت کی جارہی ہے مگر دوسری طرف سکولوں کے لاکھوں طلبا و طالبات کو بے یارومددگار چھوڑا جا رہا ہے۔ انہوں نے کہا کہ اکثریتی سرکاری سکولوں میں با لخصوص اورنجی و پرائیویٹ تعلیمی اداروں کے کلاس رومز میں با لعموم بچوں کیلئے مناسب ہوا، پنکھوں، ایگزاسٹ فینز، سایہ، الیکٹرک واٹر کولرز،وینٹی لیشن، جنریٹرز، یو پی ایس اور فرسٹ ایڈ وغیرہ کا کوئی انتظام نہیں جس نے ان کی زندگیوں کو داؤ پر لگادیا ہے۔ انہوں نے کہا کہ رہی سہی کسر بجلی کی بار بار بندش نے پوری کردی ہے جس کے باعث بچے سکولوں میں ناقص، غیر معیاری و آلودہ اور مضر صحت پانی پینے پر مجبور ہیں اسی طرح سکولوں کی کنٹینز پر گھٹیا و دو نمبر کولڈ ڈرنکس کی فروخت جاری ہے جس نے والدین کو سخت اذیت میں مبتلا کردیا ہے۔انہوں نے کہا کہ سکول سربراہان نے بجلی جانے کی صورت میں متبادل کے طور پرمیں اپنے دفاتر کیلئے تو یو پی ایس اور جنریٹرز کا اہتمام کر رکھا ہے لیکن جن بچوں کی فیسوں سے وہ تنخواہ لیتے ہیں ان کی انہیں کوئی فکر نہیں۔
انہوں نے کہا کہ گزشتہ روز بھی فیصل آباد کے ایک گرلز سکول میں کلاس ہفتم کی طالبہ ثنا شاہین گرمی کی شدت کے باعث دم توڑ گئی ہے لیکن اعلیٰ حکام پراسرار چپ اختیار کئے و خاموش تماشائی بنے ہوئے ہیں۔ انہوں نے کہا کہ شدید گرمی میں بچوں کو تعلیمی اداروں تک چھوڑ کر آنا اور پھر واپس لا نے سمیت پک اینڈ ڈراپ کا مسئلہ بھی گھمبیر صورت اختیار کر چکا ہے لہٰذا مزید بچوں کی قیمتی جانیں ضائع ہونے کا انتظار کئے بغیر فوری طور پر
صوبہ بھر کے تمام تعلیمی اداروں میں موسم گرما کی تعطیلات کا اعلان کیا جا ئے اور بورڈز آف انٹرمیڈیٹ اینڈ سیکنڈری ایجوکیشنز کے زیر اہتمام میٹرک کے جوسالانہ امتحانات جاری ہیں ان امتحانات کے سنٹرز پر بجلی، پنکھوں، ایگزاسٹ فینز اور ٹھنڈے پانی کا وافر انتظام رکھا جا ئے تاکہ بدترین گرمی میں ناخوشگوار واقعات سے بچا جا سکے۔دوسری جانب محکمہ موسمیات نے رواں ہفتہ کے دوران پنجاب کے جنوبی و وسطی سمیت ملک بھر
کے اکثریتی علاقوں میں شدیدگرمی کی لہر جاری رہنے کی پیش گوئی کی ہے اور شہریوں کو بیحد احتیاط کا مشورہ بھی دیا ہے۔محکمہ موسمیات کے مطابق رواں پورے ہفتہ کے دوران ملک بھر میں گرمی کی شدید لہریں متوقع ہیں جس کے باعث رواں ہفتہ کے دوران موسم کی شدت میں اضافے کے سبب پنجاب کے بالائی علاقوں میں دن کے وقت درجہ حرارت معمول سے 7سے9ڈگری زیادہ رہنے کا امکان ہے اس طرح رواں ہفتے پنجاب کے وسطی و
جنوبی علاقے بھی شدید گرمی کی لپیٹ میں رہیں گے۔محکمہ موسمیات کے ترجمان نے بتایا کہ جنوبی و وسطی پنجاب میں دن کے اوقات میں درجہ حرارت معمول سے 6سے 8ڈگری بلند رہے گاجبکہ گرمی کی شدت کے سبب آبی ذخائر،فصلوں اور باغات کو پانی کی ترسیل میں کمی اور توانائی کی طلب میں مزیداضافے کے بھی امکانات ہیں۔دریں اثناپنجاب ڈیزاسٹر مینجمنٹ اتھارٹی کی جانب سے تمام متعلقہ اداروں کوموسم گرما میں شدت کے سبب ہنگامی حالات میں فوری امدادی کاروائیوں کے احکامات جاری کئے جا چکے ہیں
اور بتایا گیا ہے کہ پنجاب ڈیزاسٹر مینجمنٹ اتھارٹی سمیت تمام متعلقہ ادارے اپنی ذمہ داریوں کی ادائیگی کیلئے مستعد ہیں تاہم عوام سے اپیل کی گئی ہے کہ وہ پانی اور بجلی کا بے جا استعمال نہ کریں اور رواں پورے ہفتے دن کے اوقات میں زیادہ سے زیادہ وقت گھروں کے اندر گزاریں، بلا ضرورت گھر سے باہر نکلنے سے اجتناب کریں،پانی اور ٹھنڈے مشروبات کا استعمال کریں،مرغن غذاؤں سے پرہیز کریں،نرم اور ہوا دار لباس کا انتخاب کریں،گھروں سے نکلتے وقت چھتری اور پانی کی بوتل ساتھ رکھیں، سروگردن اور چہرے کو ڈھانپ کر رکھیں اور خواتین چولہے کے سامنے کم سے کم وقت صرف کریں۔
