لاہور( این این آئی) پنجاب حکومت کے گرین ای ٹیکسی پلان کی تفصیلات جاری کر دی گئیں، منصوبے کے تحت ٹیکسی حاصل کرنے کے لیے اہلیت کے معیار بھی واضح کر دئیے گئے ۔پنجاب حکومت نے نوجوانوں کے لیے گرین ای ٹیکسی سکیم 2025 کا آغاز کر دیا ہے۔ اس منصوبے کے ذریعے نوجوانوں کو آسان اقساط پر الیکٹرک اور ہائبرڈ ٹیکسیاں فراہم کی جائیں گی۔
یہ پروگرام نہ صرف نوجوانوں کو روزگار کے پائیدار مواقع فراہم کرے گا بلکہ صوبے بھر میں ماحول دوست ٹرانسپورٹ کو بھی فروغ دے گا۔اہلیت کے مطابق درخواست دہندگان کا پاکستان کا شہری ہونا ضروری ہے (ترجیحی طور پر پنجاب ڈومیسائل)، عمر 21 سے 45 سال کے درمیان، کمپیوٹرائزڈ قومی شناختی کارڈ اور ڈرائیونگ لائسنس(میعاد ختم ہونے کی تاریخ کے ساتھ) لازمی ہو۔یہ اسکیم کم آمدنی والے افراد کیلئے ہے۔ مجرمانہ ریکارڈ رکھنے والے، عمر کی حد سے باہر، یا زیادہ آمدنی والے افراد اس منصوبے کے اہل نہیں ہوں گے۔مطلوبہ دستاویزات کے مطابق قومی شناختی کارڈ، درست ڈرائیونگ لائسنس، پاسپورٹ سائز فوٹو، ایڈریس کی تصدیق کے لیے ڈومیسائل یا یوٹیلیٹی بل اور بینک اکائونٹ لازمی ہیں
درخواست دہندگان جو ایک سے زیادہ گاڑیوں کے مالک ہونا چاہتے ہیں انہیں این ٹی این یا کاروباری معلومات فراہم کرنے کی ضرورت ہو سکتی ہے۔درخواست دینے کے لئے آن لائن ایپلیکیشن پورٹل پر، درخواست دہندگان اپنے شناختی اور فون نمبر کا استعمال کرتے ہوئے خود کو رجسٹر کریں گے،او ٹی پی کے ذریعے تصدیق کریں گے، اپنی تفصیلات، آپریشن کے پسندیدہ شہر کا انتخاب کریں گے، اور وہ الیکٹرک یا ہائبرڈ کیب میں کون سی ٹیکسی لینا چاہتے ہیں۔ایک بار دستاویزات اپ لوڈ اور منظور ہو جانے کے بعد، کامیاب امیدوار بینک دستاویزات کا عمل مکمل کر لیں گے اور ٹیکسی حاصل کرنے کا شیڈول حاصل کر لیں گے۔پنجاب حکومت نے خواہشمند امیدواروں سے درخواست کی ہے کہ وہ جلد از جلد اپنی درخواستیں جمع کرائیں۔ کیونکہ گرین ای ٹیکسی اسکیم 2025 کی آخری تاریخ کا اعلان سرکاری پورٹل کے ذریعے کیا جائے گا۔
