لاہور (این این آئی) محکمہ موسمیات نے پنجاب کے بیشتر اضلاع میں ہلکی بارشوں کی پیشگوئی کر دی ۔ترجمان پی ڈی ایم اے کے مطابق 4سے 5نومبر کے دوران پنجاب کے بیشتر اضلاع میں بارش کا امکان ہے۔ لاہور، راولپنڈی، مری، گلیات، اٹک، تلہ گنگ، جہلم، سرگودھا، خوشاب، گجرانوالہ، سیالکوٹ اور نارووال میں بارشوں کا امکان ہے۔

مری، گلیات سمیت دیگر پہاڑی علاقوں میں برف باری کی پیشگوئی ہے۔ اس حوالے سے ڈی جی پی ڈی ایم اے عرفان علی کاٹھیا نے کہا کہ بارشوں کے باعث درجہ حرارت میں واضح طور پر کمی واقع ہوگی، ممکنہ بارشوں سے سموگ میں کمی کے امکانات ہیں،سموگ سے بچائو کے لئے ماسک کا استعمال کریں اور غیر ضروری باہر نہ نکلیں ۔انہوں نے کہا کہ پی ڈی ایم اے کنٹرول روم میں صورتحال کی مانیٹرنگ 24/7 جاری ہے، شہری خراب موسم کی صورتحال میں غیر ضروری سفر سے گریز کریں، کسان اپنی سرگرمیوں کو موسم کی صورتحال کے مطابق ترتیب دیں،دوران سفر فوگ لائیٹس کا استعمال کریں ، ہنگامی صورتحال میں پی ڈی ایم اے کی ہیلپ لائن 1129 پر کال کر سکتے ہیں۔