اسلام آ باد(نیوز ڈ یسک)محکمہ موسمیات نے پیش گوئی کی ہے کہ آئندہ 24 گھنٹوں کے دوران وفاقی دارالحکومت اسلام آباد کے چند علاقوں میں ہلکی بارش ہو سکتی ہے،
جبکہ بلوچستان کے بیشتر اضلاع میں موسم شدید سرد رہنے کا امکان ہے۔ پنجاب کے زیادہ تر حصوں میں سرد اور خشک موسم برقرار رہے گا، تاہم نارووال، سیالکوٹ اور جہلم میں بارش برسنے کی توقع ظاہر کی گئی ہے۔ مری، گلیات اور ان کے نواحی علاقوں میں بارش کے ساتھ برفباری کا بھی امکان ہے۔محکمہ موسمیات کے مطابق خیبرپختونخوا کے مختلف اضلاع جن میں ایبٹ آباد، مانسہرہ، بٹگرام، کوہستان، دیر اور سوات شامل ہیں، وہاں بعض مقامات پر تیز بارش اور برف پڑنے کا خدشہ ہے۔ اسی طرح گلگت بلتستان کے چند علاقوں میں بھی بارش اور برفباری متوقع ہے، جبکہ سندھ کے زیادہ تر اضلاع میں موسم سرد اور خشک رہنے کی پیشگوئی کی گئی ہے۔دوسری طرف لاہور میں فضائی آلودگی کی صورتحال ایک بار پھر سنگین ہو گئی ہے اور شہر دنیا کے آلودہ ترین شہروں کی فہرست میں ساتویں نمبر پر آ گیا ہے۔ شہر کا مجموعی ایئر کوالٹی انڈیکس 184 ریکارڈ کیا گیا ہے۔اعداد و شمار کے مطابق لاہور کے علاقے ڈی ایچ اے فیز ایٹ میں آلودگی کی سطح سب سے زیادہ رہی جہاں اے کیو آئی 423 تک پہنچ گیا، جبکہ وحدت روڈ میں 348 اور ٹھوکر نیاز بیگ میں 324 کی سطح ریکارڈ کی گئی۔
محکمہ موسمیات کے مطابق لاہور میں موسم خوشگوار اور خنک ہے، کم سے کم درجہ حرارت 8 ڈگری سینٹی گریڈ ریکارڈ ہوا ہے جبکہ زیادہ سے زیادہ درجہ حرارت 21 ڈگری سینٹی گریڈ تک جانے کا امکان ہے۔ اس وقت شہر میں ہوائیں تقریباً 3 کلومیٹر فی گھنٹہ کی رفتار سے چل رہی ہیں۔
