اسلام آباد (نیوز ڈیسک) آئی سی سی نے ٹی ٹوئنٹی ورلڈکپ میں پاکستان کی جانب سے بھارت کے خلاف میچ نہ کھیلنے کے ممکنہ فیصلے پر اپنا مؤقف واضح کر دیا ہے۔

انٹرنیشنل کرکٹ کونسل کی جانب سے جاری بیان میں کہا گیا ہے کہ پاکستان حکومت کے اس بیان کو نوٹ کیا گیا ہے جس میں قومی ٹیم کی آئی سی سی مینز ٹی ٹوئنٹی ورلڈکپ 2026 میں شرکت سے متعلق ہدایات دی گئی ہیں۔آئی سی سی کا کہنا ہے کہ وہ اس معاملے پر پاکستان کرکٹ بورڈ کے باضابطہ فیصلے کا انتظار کر رہی ہے، تاہم اس نوعیت کا مؤقف عالمی سطح کے کھیلوں کے ایونٹ کے بنیادی اصولوں سے ہم آہنگ نہیں، جہاں تمام کوالیفائی ٹیموں سے توقع کی جاتی ہے کہ وہ طے شدہ شیڈول کے مطابق یکساں بنیادوں پر مقابلے میں حصہ لیں۔بیان میں مزید کہا گیا ہے کہ آئی سی سی کے ٹورنامنٹس کی بنیاد شفافیت، دیانت داری، تسلسل اور منصفانہ مسابقت پر ہوتی ہے۔ اگرچہ ادارہ قومی پالیسی معاملات میں حکومتوں کے کردار کا احترام کرتا ہے، تاہم اس قسم کے فیصلے عالمی کرکٹ، شائقینِ کھیل اور بالخصوص پاکستان کے لاکھوں مداحوں کے مفاد میں نہیں ہوں گے۔

آئی سی سی نے امید ظاہر کی ہے کہ پاکستان کرکٹ بورڈ اس فیصلے کے ممکنہ طویل المدتی اور ملکی سطح پر اثرات کا سنجیدگی سے جائزہ لے گا، کیونکہ اس کے عالمی کرکٹ نظام پر منفی نتائج مرتب ہو سکتے ہیں، جس کا پی سی بی خود بھی ایک رکن اور فائدہ اٹھانے والا فریق ہے۔

انٹرنیشنل کرکٹ کونسل کے مطابق اس کی اولین ترجیح آئی سی سی مینز ٹی ٹوئنٹی ورلڈکپ کا کامیاب انعقاد ہے، اور اس مقصد کے لیے پی سی بی سمیت تمام رکن ممالک پر ذمہ داری عائد ہوتی ہے۔ آئی سی سی کو توقع ہے کہ پی سی بی تمام متعلقہ فریقین کے مفادات کو مدنظر رکھتے ہوئے باہمی طور پر قابلِ قبول حل تلاش کرے گا۔