اسلا م آباد(مانیٹرنگ ڈیسک/این این آئی)23سال قبل 28مئی 1998ءکو بھارت کے ایٹمی دھماکوں کے جواب پاکستان نے ایٹمی دھماکے کرکے نہ صرف ملک کا دفاع ناقابل تسخیر بنایا بلکہ مسلم دنیا کی پہلی اور دنیا کی ساتویں ایٹمی طاقت بننے کا اعزاز حاصل کیا جسے ہر سال یوم تکبیر کے نام سے انتہائی جوش و خروش کے ساتھ منایا جاتا ہے۔اس حوالے سے سابق وزیراعظم میاں نواز شریف نے

پاکستانی قوم کو اپنے ٹویٹر پیغام میں مبارکباد پیش کی ہے انہوں نے اپنے ٹویٹر پیغام میں لکھا ہے کہ ’’اے اہلِ وطن، آپ کو یومِ تکبیر مبارک!‘‘ ۔ دوسری جانبپنجاب اسمبلی میں قائد حز ب اختلاف حمزہ شہباز نے یوم تکبیر پر اظہار تشکرکرتے ہوئے کہاکہ اللہ تعالی کا کرم ہوا کہ پاکستان کا پرچم آج پوری دنیا میں سربلند ہوا ،آج کے دن ہمیں ڈرانے کی کوشش کرنے والوں کو پاکستان کے آہنی عزم اور ارادے کا پتہ چلا ۔قائد محمد نوازشریف کی قیادت و بصیرت اور جرات کو قوم سلام پیش کرتی ہے ،نواز شریف نے ثابت کیا کہ انہیں نہ خریدا جا سکتا ہے اور نہ جھکایا جا سکتا ہے ،نواز شریف نے ثابت کیا کہ وہ صرف وہ کام کریں گے جو قوم چاہتی ہے، جو پاکستان کے مفاد میں ہے ،نواز شریف نے پوری دنیا پر ثابت کیا کہ پاکستان اپنے عزت و وقار پر کسی صورت سمجھوتہ نہیں کرے گا۔انہوںنے کہاکہ پاکستان کے سائنسدان اور جوہری پروگرام سے جڑے ہر فرد اور ادارے کو ہم سلام پیش کرتے ہیں ۔ایسی قیادت اور قوم کا یہ جذبہ اور طرزِ عمل موجود ہو تو کوئی چیلنج بھی چیلنج نہیں رہتا۔نوجوان نسل کو اس دن کی اہمیت کو سمجھنا ہوگا کیونکہ یہ ہماری آنے والی نسلوں کی نظریاتی بقا سے جڑا ہوا معاملہ ہے۔