لاہور(این این آئی)بھارتی کرکٹ بورڈ نے پاکستان میں شیڈول ایشیا ء کپ کو نیوٹرل وینیو پر کرانے کی کوششیں تیزکر دیں۔بھارتی میڈیا کے مطابق دونوں ممالک کی سیاسی صورتحال کے پیش نظربھارت کے پاکستان میں آ کر کھیلنے کے امکانات کم ہیں۔بھارتی میڈیا کا کہنا ہے کہ ایشیاء کپ میں بھارتی ٹیم کی شرکت کے حوالے سے حتمی فیصلہ جون میں بورڈ کے اہم اجلاس میں زیر غور آئے گا۔یاد رہے اے سی سی اجلاس میں 6 ملکی ایشیا ء کپ کی میزبانی پاکستان کو دینے کا فیصلہ کیا گیا تھا۔بعد ازاں بھارت کے
سکیورٹی خدشات کے باوجود گزشتہ سال اکتوبر میں ہونے والے اجلاس میں بھی اس فیصلے کی توثیق کردی تھی۔واضح رہے اس سے قبل بھارت میں کرکٹ سے متعلق معاملات پر نظر رکھنے والے ادارے بورڈ آف کنٹرول فار کرکٹ ان انڈیا نے ایشین کرکٹ کونسل سے ایشیا ء کپ 2020 کا مقام بدلنے کا مطالبہ کیا تھا۔بی سی سی آئی کی جانب سے جاری بیان میں کہا گیا ہے کہ اگر ایشیا ء کپ پاکستان میں ہوا تو بھارت شرکت نہیں کرے گا، پاکستان ایشیا ء کپ کی میزبانی پاکستان کے بجائے کہیں اور کرے۔
