اسلام آباد (نیوز ڈیسک) خیبر پختونخوا حکومت نے اٹارنی کیڈر سے وابستہ سرکاری افسران کے لیے اہم فیصلہ کرتے ہوئے ان کے پرفارمنس الاؤنس میں نمایاں اضافہ کر دیا ہے۔ صوبائی کابینہ نے اس الاؤنس کو 60 فیصد سے بڑھا کر 100 فیصد کرنے کی منظوری دے دی ہے۔

سرکاری اعلامیے کے مطابق نظرثانی شدہ الاؤنس کا تعین 2022 کی ابتدائی بنیادی تنخواہ کی بنیاد پر کیا جائے گا۔ تاہم اس سہولت میں پنشن اور گریجویٹی شامل نہیں ہوں گی، جبکہ یہ الاؤنس قابلِ ٹیکس بھی ہوگا۔

حکومت نے واضح کیا ہے کہ غیر معمولی رخصت، طویل چھٹی یا معطلی کے دوران متعلقہ افسران کو یہ الاؤنس ادا نہیں کیا جائے گا۔

اعلامیے کے مطابق یہ سہولت صرف اٹارنی کیڈر کے اہل افسران تک محدود رہے گی۔ مارکیٹ بیسڈ تنخواہوں یا خصوصی پیکیج پر تعینات ملازمین اور دیگر غیر اٹارنی کیڈر افسران اس الاؤنس کے مستحق نہیں ہوں گے۔

صوبائی حکومت نے مزید بتایا کہ اس فیصلے کے بعد اس معاملے سے متعلق پہلے جاری کیے گئے تمام احکامات اور نوٹیفکیشن منسوخ تصور کیے جائیں گے۔