اسلام آباد (نیوز ڈیسک) سینئر صحافی تجزیہ کار جاوید چوہدری نے کہا ہے کہ پاسدران انقلاب ،مشرق سطیٰ کو کمزور کررہا ہے ،
یہ گریٹر اسرائیل بنوا کرہی چھوڑیں گے، بدقسمتی کہ اس وقت امریکا ایران کے درمیان کوئی ملک نہیں،پاکستان بھی ایران سے ناراض ہے۔انہوں نے پوڈکاسٹ میں گفتگو کرتے ہوئے کہا کہ بدقسمتی سے اس وقت امریکا ایران کے درمیان کوئی ملک نہیں جو موجودہ صورتحال کو سنبھال سکے ،پاکستان ایران سے ناراض ہے، پہلے ایران ناراض ہوا تھا لیکن اب پاکستان ایران سے ناراض ہے۔
یہ ناراضگی اس خط سے شروع ہوئی جو دینے کیلئے محسن نقوی ایران گئے تھے۔ ایرانیوں کا کلچر ہے جب پیچھے دوڑتے ہیں تو یہ پھر پہاڑ پر چڑھتے ہیں، محسن نقوی وہاں چھ مرتبہ گئے، جب اتنے سینئر وزیر کو چھ مرتبہ بھیجیں گے تو اس سے کرائسز پیدا ہوگا۔ایرانیوں کو محسوس ہوا کہ شاید پاکستان کی کوئی بہت زیادہ مجبوری ہے۔پھر جب مجتبیٰ خامنہ ای کو خط دیا گیا تو اس پر بھی مائنڈ کیا کہ مشورہ دینے وال پاکستان کون ہوتا ہے؟ جبکہ پاکستان نے مشورہ دیا تھا کہ بہترین وقت ہے کہ معاملات کو حل کریں، امریکی اس وقت معاملات کو حل کرنا چاہتے ہیں اگر آپ ضد کریں گے تو اس کا نقصان ہوگا، یہ بڑا مئودبانہ درخواست پر مبنی خط تھا لیکن ایرانیوں نے اس کا برا منایا۔
پھر بعد میں آپ دیکھیں کہ پاکستان میں نہیں آئے، پھر سوئٹزرلینڈ نہیں گئے بعد میں گئے۔ پھر انہوں نے قطر اور عمان کی حوصلہ افزائی کی۔ ایران کو محسوس ہورہا تھا کہ پاکستان کا پروفائل بہت بلند ہورہا ہے، پاکستان اس چیز کا فائدہ اٹھا رہا ہے۔ یہ سب کچھ پاسدران انقلاب کررہے تھے، ایران میں سیاسی حکومت پاسدران کی کٹھ پتلی ہے، اب پاسدران کی کوشش ہے کہ سیاسی لیڈرشپ کو ہٹا کرتمام عہدوں پر پاسدران آجائیں ۔پاسدران انقلاب ایران اور مڈل ایسٹ کو کمزور کررہے ، یہ گریٹر اسرائیل بنوا کر ہی رہیں گے۔اب دنیا امریکا کے ساتھ شامل ہورہی ہے ، دنیا کو محسوس ہوا کہ ایران معاملات کو حل نہیں کرنا چاہتا۔پہلے لوگ امریکا کے خلاف تھے، اب یورپ ، نیٹو سب امریکا کے ساتھ مل رہے ہیں۔
