اسلام آباد(این این آئی)وفاقی حکومت نے پیٹرولیم مصنوعات کی قیمتوں میں رد و بدل کرتے ہوئے (آج)بدھ کیلئے پیٹرول کی فی لیٹر قیمت میں 3 روپے سے زائد کی کمی کردی

جبکہ ہائی اسپیڈ ڈیزل کی فی لیٹر قیمت میں 2روپے سے زائد کا اضافہ کردیا ۔وزارت پیٹرولیم ڈویژن نے (آج)بدھ28اکتوبر کے لیے پیٹرول اور ڈیزل کی نئی قیمتوں کا نوٹیفکیشن بھی جاری کردیا ہے، جس میں بتایا گیا کہ آئل اینڈ گیس ریگیولیٹری اتھارٹی (اوگرا)نے وفاقی حکومت کے جاری کردہ طریقہ کار کی بنیاد پر پیٹرولیم مصنوعات کی قیمتوں میں رد وبدل کیا ہے۔نوٹیفکیشن کے مطابق پیٹرول کی فی لیٹر قیمت میں 3روپے 19پیسے کی کمی کی گئی جس کے بعد پیٹرول کی قیمت 379روپے 25پیسے سے کم ہو کر 376روپے 06پیسے فی لیٹر ہوگئی ہے۔

اسی طرح ہائی اسپیڈ ڈیزل کی فی لیٹر قیمت میں 2روپے 25پیسے کا اضافہ کیا گیا ، اس اضافے کے بعد ہائی اسپیڈ ڈیزل کی قیمت 395روپے 82پیسے بڑھ کر 398روپے 07پیسے فی لیٹر ہوگئی ہے۔پیٹرولیم ڈویژن کی جانب سے جاری کردہ نوٹیفکیشن کے مطابق پیٹرولیم مصنوعات کی نئی قیمتوں کا اطلاق رات 12بجے سے ہوگیاجو(آج)بدھ28اکتوبرکیلئے ہوں گی۔اعلامیے میں کہا گیا کہ عالمی مارکیٹ میں تبدیلیوں، پلاٹس ریٹس، پریمیم اور دیگر اخراجات کو مدنظر رکھتے ہوئے پٹرولیم مصنوعات کی قیمتوں میں ردوبدل کیا گیا ہے۔