لاہور(این این آئی)بھارتی شہر امرتسر سے احمد آباد جانے والی انڈیگو ایئر لائن کی پرواز خراب موسم کی وجہ سے لاہور کے قریب پاکستان کی فضائی حدود میں داخل ہوگئی۔نجی ٹی وی کے مطابق بھارتی میڈیا نے بتایاکہ پاکستان کی فضائی حدود میں داخل ہونے والی پرواز 30منٹ بعد بغیر کسی حادثے کے واپس بھارتی حدود میں داخل ہوگئی۔مذکورہ واقعہ اتوار کی شام 7.30بجے کے قریب پیش آیا، بھارتی طیارہ گوجرانوالہ کے قریب سے8.01بجے تک پاکستان کی فضائی حدود میں رہا۔

پرواز امرتسر سے احمد آباد تک چل رہی تھی لیکن موسم کی خرابی کے باعث اٹاری کے اوپر سے پاکستان کی فضائی حدود میں داخل ہوگئی۔انڈیگو ایئرلائن کے بیان کے مطابق وہ ٹیلی فون کے ذریعے امرتسر ایئر ٹریفک کنٹرول سے پاکستان کے ساتھ رابطے میں تھے، پرواز بحفاظت احمد آباد میں لینڈ کرگئی ہے۔مئی میں پاکستان انٹرنیشنل ایئرلائنز(پی آئی اے)کی ایک پرواز بھارتی فضائی حدود میں داخل ہوگئی تھی کیونکہ شدید بارش کی وجہ سے پرواز کو تقریبا 10منٹ تک بھارتی حدود میں رہنا پڑا تھا۔