اسلام آباد (این این آئی)پاکستان تحریک انصاف کے اہم رہنماؤں نے پاکستان پیپلزپارٹی میں شمولیت کا اعلان کیا۔چوہدری زاہد فرید وائس (چیئرمین ضلع جہلم ویلی)، چوہدری محمد شکیل (سابق اسپیکر یوتھ اسمبلی)، چوہدری ساجد رفیق، چوہدری عابد حسین اور چوہدری ساجد نے اپنے ساتھیوں اور کثیر تعداد میں کارکنان کے ہمراہ پاکستان پیپلزپارٹی میں شمولیت کا باضابطہ اعلان کیا۔یہ شمولیت گورنر پنجاب سردار سلیم حیدر اور صدر آزاد کشمیر چوہدری یاسین کی موجودگی میں عمل میں آئی۔ اس موقع پر رہنماؤں نے چیئرمین پاکستان پیپلزپارٹی بلاول بھٹو زرداری کی قیادت، عوام دوست وڑن اور نوجوانوں کو بااختیار بنانے کی پالیسیوں پر مکمل اعتماد کا اظہار کیا۔
نئے شامل ہونے والے رہنماؤں نے کہا کہ چیرمین پاکستان پیپلزپارٹی بلاول بھٹو زرداری کی قیادت میں پاکستان پیپلزپارٹی واحد جماعت ہے جو ملک کو درپیش سیاسی، معاشی اور عوامی مسائل کا ادراک رکھتی ہے اور عملی حل پیش کرنے کی صلاحیت رکھتی ہے۔ انہوں نے قائدِ عوام شہید ذوالفقار علی بھٹو اور شہید محترمہ بینظیر بھٹو کے جمہوری فلسفے کو آگے بڑھانے کے عزم کا بھی اعادہ کیا۔گورنر پنجاب سردار سلیم حیدر اور صدر آزاد کشمیر چوہدری یاسین نے شمولیت اختیار کرنے والے رہنماؤں اور کارکنان کا خیرمقدم کرتے ہوئے کہا کہ ان شمولیتوں سے پاکستان پیپلزپارٹی مزید مضبوط ہو گی اور چیئرمین بلاول بھٹو زرداری کے عوامی ایجنڈے کو نچلی سطح تک پہنچانے میں مدد ملے گی۔
