کراچی (این این آئی)ماہر معاشیات مزمل اسلم نے کہا ہے کہ مفتاح اسماعیل نے اپنے ہی وزیر خزانہ اسحاق ڈار کا پول کھول دیا ہے کہ انہوں نے ماضی میں کیا کچھ کیا اور اب کیا کر رہے ہیں۔ موجودہ پی ڈی ایم حکومت کے سابق وزیر خزانہ مفتاح اسماعیل کی جانب سے ملک کے دیوالیہ ہونے کا خدشہ خطرناک حد تک بڑھ جانے کے
بیان پر ماہر معاشیات مزمل اسلم نے ردعمل دیتے ہوئے کہا ہے کہ مفتاح نے اپنے ہی وزیر خزانہ اسحاق ڈار کا پول کھول دیا ہے کہ انہوں نے ماضی میں کیا کچھ کیا اور اب کیا کر رہے ہیں۔مزمل اسلم نے اپنے بیان میں کہا کہ آج صورتحال یہ ہے کہ سرمایہ کار پاکستان چھوڑ کر جا رہے ہیں۔ بین الاقوامی کمپنیوں کی ادائیگیاں رکی ہوئی ہیں۔ ملک میں ڈیزل کی کمی کا خدشہ بھی بڑھ رہا ہے۔ پہلے اسٹیٹ بینک نے 34 ملین ڈالر کی ادائیگی روک دی بعد میں تردید کی۔ ترکش ایئر لائن نے بھی کہا 26 ملین ڈالر کی رقم پاکستان نے روکی ہوئی ہے۔سابق ترجمان وزارت خزانہ نے کہا کہ ایل سیز کھولنے پر 8 ملین ڈالر کا پریمیئم مانگ رہے ہیں۔ سیمنٹ کی سیلز 23 فیصد گر گئیں۔ 41 فیصد چاول کی فصل سیلز گر گئیں۔انہوں نے کہا کہ اسحاق ڈار ڈالر کنٹرول کرنے کا کہتے ہیں، ان کی تمام باتیں جھوٹی ہیں۔ پاکستان میں ہر طریقے کا فرنیچر بن سکتا ہے۔ 75 سال میں جنگلات پر توجہ نہیں دی گئی۔ عمران خان نے شجر کاری اور جنگلات کو فروغ دیا۔ اب موسمیاتی تبدیلی پر قرض ملے گا۔واضح رہے کہ سابق وزیر خزانہ مفتاح اسماعیل نے اپنے ایک مضمون میں موجودہ وزیر اسحاق ڈار کے معیشت کے حوالے سے دعوے کو مسترد کرتے ہوئے واضح طور پر کہا ہے کہ ملک کے دیوالیہ ہونے کا خطرہ خطرناک حد تک بڑھ گیا ہے۔ اب حکومت کے پاس غلطی کی کوئی گنجائش نہیں ہے۔
