ممبئی(نیوز ڈیسک) سنجے دت بالی ووڈ کے ان اداکاروں میں سے ایک ہیں جو ہمیشہ مختلف تنازعات اور مشکلات کا شکار رہے، نشے کی عادت، فلموں میں ناکامی، عشق میں ناکامی، دہشت گردوں کی مدد کا الزام، جیل، ناجائز اسلحہ خریدنے، انڈر ورلڈ سے تعلق کا الزام اور پھر ایک بار پھر جیل یاترا، ان سب مشکلات کے باوجود وہ ہر بار پہلے سے زیادہ مضبوط ہو کر سامنے آئے ہیں۔ سیمی اگروال کو ایک انٹرویو میں انہوں نے اپنی زندگی کی مشکلات کے بارے میں گفتگو کی۔سنجے دت نے بتایا کہ وہ کالج میں تھے جب انہوں نے پہلی بار منشیات کا استعمال شروع کیا، گولیاں کھائیں، انجکشنز لئے اور کوکین کا استعمال بھی کیا۔ ایک بار وہ ہیروئن کا نشہ کرنے کے بعد سو گئے، کچھ دیر بعد جاگ کر ملازم سے کھانا مانگا تو ملازم انہیں دیکھ کر رونے لگا اور بتایا کہ وہ دو روز کے بعد جاگے ہیں۔ سنجے دت نے کہا کہ اس وقت میں بہت پریشان ہوا، میں اپنے والد کے پاس گیا اور انہیں کہا کہ مجھے بچا لیں، انہوں نے مجھے اپنے ایک دوست ڈاکٹر کے پاس بھیجا اور میں بحالی کے لئے امریکہ چلا گیا۔ امریکہ میں علاج مکمل ہونے کے بعد واپس پہنچا تو مجھے منشیات دینے والا پہنچ گیا اور کہا کہ اس کے پاس ایک اورنیا آئٹم آیا ہے لیکن میں نے انکار کر دیا۔سنجے دت نے کہا کہ میں امریکہ میں علاج کے بعد واپس نہیں آنا چاہتا تھا لیکن میرے والد بضد تھے کہ میں واپس آو¿ں، میں نے ایک سال کے لئے بھارت رہنے کا فیصلہ کیا، کام ڈھونڈا لیکن کوئی کام نہ ملا، جب صرف دو مہینے باقی رہ گئے تو مجھے پہلی فلم میں کام ملا، اس کے بعد امریکہ جانے کا خیال دل سے نکال دیا۔