لاہور (نیوز ڈیسک) بالی ووڈ اداکارہ کاجول فلمی سرگرمیوں میں چاہے کتنی ہی مصروف کیوں نہ ہوں، اپنے گھر ، شوہر اور بچوں کو ہمیشہ اولیت دیتی ہیں، اس کا ثبوت گزشتہ روز اس وقت دیکھنے کو ملا جب کاجول اجے دیوگن کے ایک فون پر دوڑی دوڑی گھر چلی گئیں۔ کاجول اپنی بہن تنیشا مکھر جی کے ڈرامے ”دی جیوری“ کے حوالے سے ایک پریس کانفرنس سے خطاب کررہی تھیں کہ اسی دوران انہیں اجے دیوگن کی جانب سے فون موصول ہوا۔ فون پر بات کرنے کے بعد کاجول کی آنکھوں میں آنسو صاف دکھائی دے رہے تھے۔ اس کے بعد انہوں نے ڈرائیور کو ہنگامی طور پر گاڑی نکالنے کا کہا اور خود بھی واپسی کی تیاری پکڑی۔ گاڑی میں سوار ہونے سے قبل ہی وہ ڈرائیورکو ڈرائیونگ سیٹ چھوڑنے کا اشارہ بھی کرچکی تھیں اور خود ہی گاڑی ڈرائیو کرتی ہوئی گھر گئیں۔کاجول کے پریس کانفرنس ادھوری چھوڑ کے اجے دیوگن کی ایک کال پر یوں دوڑے دوڑے گھر چلے جانے کی خبروں سے سوشل میڈیا پر افواہوں کا طوفان کھڑا گیا۔ بعد میں اجے دیوگن نے ٹوئٹر پر اپنی اہلیہ کا شکریہ اداکرتے ہوئے انکشاف کیا کہ ان کے بیٹے یوگ کی طبیعت خراب تھی اور اجے دیوگن، گھر پر اس کی دیکھ بھال کررہے تھے تاہم اسکا بخار تیز ہونے لگا جس پر انہوں نے کاجول کو فون کیا تھا اور اداکارہ پریس کانفرنس ادھوری چھوڑ کے فوراً گھر چلی گئیں۔