لاس اینجلس(نیوز ڈیسک) امریکی گلوکارہ اور اداکارہ گوئن سٹیفانی اور گیون روسڈیل میں علیحدگی ہو گئی۔ دونوں کی شادی 13 سال قبل ہوئی تھی اور ان کے تین بچے ہیں۔ اگرچہ ابھی تک طلاق کی باضابطہ کارروائی مکمل نہیں ہوئی لیکن گوئن نے طلاق کے لئے عدالت میں کیس دائر کر دیا ہے اور وہ اپنا گھر چھوڑ کر علیحدہ گھر میں منتقل ہو چکی ہیں۔گوئن اور گیون نے مشترکہ بیان میں کہا کہ ہم نے یہ فیصلہ کیا ہے کہ اب ہم شادی شدہ زندگی میں ایک دوسرے کے پارٹنر نہیں رہیں گے تاہم اپنے تینوں بچوں کے پرورش ہم اسی انداز میں کریں گے اور اس حوالے سے ہم پارٹنر رہیں گے۔ ہم چاہتے ہیں کہ ہمارے بچے صحت مند ماحول میں پروان چڑھیں۔ 45 سالہ گوائن نے 49 سالہ گیون سے علیحدگی کے لئے کیس فائل کیا جب کہ اب گیون نے بھی جواب داخل کرا دیا ہے۔ علیحدگی کی وجہ میں اختلافات کی شدت کو جواز بنایا گیا ہے تاہم یہ تفصیلات منظر عام پر نہیں آ سکیں کہ اختلافات کس معاملے پر ہیں۔گوئن اور گیون کے درمیان اختلافات 2010 سے چل رہے تھے تاہم دونوں نے ایک دوسرے کے ساتھ رہنے کا فیصلہ کیا۔ 2011 میں گوئن سٹیفانی نے ایک انٹرویو میں کہا تھا کہ وہ گیون کے ساتھ مزید نہیں رہنا چاہتی لیکن اپنے بچوں کی بہتر پرورش کی خاطر وہ الگ نہیں ہوں گی۔