بیجنگ(آئی این پی)چین میں گزشتہ برس دو بچہ پالیسی کے نفاذ کے بعد سال 2016 میں ایک کروڑ آٹھ لاکھ بچے پیدا ہوئے ،2020 تک ہر سال ایک کروڑ 70 لاکھ سے دو کروڑ تک بچے پیدا ہوں گے۔چین کے ادارہ برائے قومی صحت اور فیملی پلاننگ کمیشن (این ایچ ایف پی )کے مطابق پچھلے سال ایک کروڑ 70 لاکھ سے زیادہ بچے پیدا ہوئے جو کہ سال 2015 کے مقابلے میں 7.9 فیصد زیادہ تھے

۔سال 2016 میں پیدا ہونے والے بچوں میں سے 45 فیصد ایسے تھے جن کے بڑے بھائی یا بہن تھے۔این ایچ ایف پی کے یانگ وین ڑوانگ نے کہا کہ فیملی پلاننگ پالیسی میں تبدیلی کے مثبت نتائج سامنے آئے ہیں اور انھوں نے امید ظاہر کی کہ 2020 تک ہر سال ایک کروڑ 70 لاکھ سے دو کروڑ تک بچے پیدا ہوں گے۔حکومتی اہلکاروں کے مطابق 2050 تک ملک میں تقریباًتین کروڑ افراد کام کرنے کی عمر تک پہنچ گئے ہوں
گے۔

واضح رہے کہ گزشتہ سال جنوری میں چین کی حکومت نے چالیس سال سے قائم ایک بچہ فی خاندان کی پالیسی کا خاتمہ کر دیا تھا لیکن والدین کو دوسرے بچے سے پہلے حکومت سے اجازت نامہ لینا ضروری قرار دیا تھا۔چین میں گزشتہ برس فی خاندان ایک سے زیادہ بچے کی پیدائش پر پابندی اٹھائے جانے کے بعد شرحِ پیدائش میں واضح اضافہ دیکھنے میں آیا ہے۔