کابل(آئی این پی )افغانستان میں سیکورٹی فورسز کی زمینی اور فضائی کاروائیوں میں طالبان کے فرضی گورنر سمیت 28شدت پسند ہلاک جبکہ طالبان کے 2اہم کمانڈر وں سمیت 20زخمی ہوگئے ،سیکورٹی فورسز نے کاروائی کرکے طالبان کی جیل سے 9قیدیوں کو بازیاب کرا لیا،دوسری جانب افغانستان نے ملکی دفاع اور سیکورٹی فورسز کی صلاحتوں میں اضافے کیلئے روس سے ہیلی کاپٹروں سمیت دیگر فوجی سازوسامان کی فراہمی کی درخواست کردی۔ہفتہ کو افغان میڈیا کے مطابق شمالی صوبہ بغلان میں افغان نیشنل سیکورٹی فورسز کے آپریشن میں طالبان کو بھاری جانی نقصان اٹھانا پڑا ہے ۔افغان نیشنل آرمی کی 209ویں شاہین کور کا کہنا ہے کہ گزشتہ 24گھنٹوں کے دوران ضلع دنڈے غوری کے علاقے سرخ کوتل میں آپریشن کیا گیا جس میں 21شدت پسند ہلاک اور 20دیگر زخمی ہوگئے ۔آپریشن میں سیکورٹی فورسز کو فضائیہ کی مدد بھی حاصل تھی ۔زخمی ہونے والوں میں طالبان کے 2اہم کمانڈر بھی شامل ہیں جن کی شناخت قاری بختیار اور ملا شاہ ولی کے نام سے ہوئی ہے ۔افغان سیکورٹی فورسز نے آپریشن کے دوران 10دیسی ساختہ بم ڈیوائسز کو بھی ناکا رہ بنادیا۔ادھر ایک فضائی حملے میں طالبان کا جنوب مشرقی صوبہ غزنی کیلئے فرضی گورنر ہلاک ہوگیا۔وزارت داخلہ کی طرف سے جاری بیان میں کہا گیا ہے کہ ملا قاسم اپنے دیگر ساتھیوں سمیت ضلع اب بند کے علاقے میں مارا گیا ۔تاحال اس بات کی تصدیق نہیں ہوسکی ہے کہ فضائی کاروائی افغان فورسز یا امریکہ کی طرف سے کی گئی ہے ۔جنوبی صوبہ ہلمند میں طالبان کی جیل سے 9قیدیوں کو بازیاب کرا لیا گیا ۔وزارت دفاع کے بیان میں کہا گیا ہے کہ قیدیوں کو افغان آرمی کے ایک آپریشن کے دوران رہا کرایا گیا ہے ۔بیان میں مزید کہا گیا ہے کہ افغان فضائیہ نے کاروائی کے دوران طالبان کے کمانڈ اور کنٹرول سینٹر کو بھی تباہ کردیا ہے ۔کاروائی ضلع نہار سراج میں کی گئی جس میں 6شدت پسند بھی مارے گئے ۔دوسری جانب افغانستان نے ملکی دفاع اور سیکورٹی فورسز کی صلاحتوں میں اضافے کیلئے روس سے ہیلی کاپٹروں سمیت دیگر فوجی سازوسامان کی فراہمی کی درخواست کردی ۔افغانستان کی جانب سے یہ درخواست نائب وزیر خارجہ حکمت خلیل کرزئی کے رواں ہفتے دورہ روس کے دوران کی گئی ہے ۔حکمت خلیل کرزئی کا کہنا ہے کہ ہم نے روس کی سلامتی کونسل سے دفاعی شعبے میں تعاون کو مزید فروغ دینے اورہیلی کاپٹروں کی فراہمی کی درخواست کی ہے ۔اس سے قبل افغان اور روسی دفاعی حکام نے مشترکہ طور پر بین الاقومی دہشتگردی کا مقابلہ کرنے کیلئے ایک فوجی تکنیکی تعاون کمیٹی قائم کرنے پر اتفاق کیا تھا۔