لاہور(نیوز ایجنسیاں) فیڈرل بورڈ آف ریو نیو نے سال2017سے سال 2020 تک کروڑوں روپے مالیت کا سونا،پرائز بانڈز اور ڈالرز خریدنے والے سرمایہ کار وں کی چھان بین شروع کردی ۔ ذرائع کا کہنا ہے کہ ایف بی آر کی ٹیمیں سرمایہ کاری کرنے والوں کی تھرڈ پارٹی معلومات اکٹھی کریں گی، ایف بی آر

اس امر کا جائزہ لے گا کہ ڈالرز ،پرائز بانڈز اور سونا خریدنے والوں کے پاس سرمایہ کہاں سے آیا؟ گوشواروں میں سرمایہ کاری ظاہرنہ کرنے والوں کا بھی کڑا حساب ہوگا۔ڈالرز، پرائز بانڈز اور سونے کے غیر رجسٹرڈ سرمایہ کاروں کو ٹیکس نیٹ میں شامل کرنے کیلئے نوٹسز جاری کئے جائیں گے،ٹیکس نیٹ میں موجود ہونے کے باوجود سرمایہ کاری کی درست تفصیلات چھپانے والوں کو بھاری جرمانے بھی کئے جائیں گے ۔دوسری جانب 1500 اور100 روپے مالیت کے قومی انعامی بانڈز کی قرعہ انداز ی 17 مئی کو ہوگی 1500 روپے مالیت کے انعامی بانڈز کی قرعہ اندازی کا پہلا انعام 30 لاکھ روپے کا ایک،دوسراانعام دس لاکھ روپے کے تین انعامات اور تیسرا انعام18500 روپے کے1696 انعامات ہوں گے جبکہ100روپے مالیت کے انعامی بانڈزی کی قرعہ اندازی کا پہلا انعام سات لاکھ روپے کا ایک، دوسراانعامـ2لاکھ روپے کے تین انعامات اور تیسرا انعام ایک ہز ار روپے کے1199 انعامات کامیاب خوش نصیبوں میں تقسیم کیے جائیں گے۔