لاہور( این این آئی)پاکستان تحریک انصاف کے مرکزی رہنما ، فوکل پرسن فوڈ سکیورٹی و خصوصی اقدامات جمشید اقبال چیمہ نے کہا ہے کہ نام نہاد تجربہ کاروں نے آٹھ ماہ میں عوام کو دو وقت کی روٹی سے بھی محروم کر دیا ہے ، امپورٹڈ ٹولے کو صرف تجربے کی بنیاد پر مسلط کیا گیا تھا
لیکن وہ تجربہ یہ تھا کہ کیسے لاکھوں لوگوں کو بیروزگار کرنا ہے،کیسے صنعتیں بند کرنی ہیں اور ملک کو کیسے دیوالیہ کرنا ہے۔اپنے بیان میں جمشید اقبال چیمہ نے کہا کہ امپورٹڈ حکومت کی مجرمانہ غفلت اور ناقص حکمت عملی کی وجہ سے ایل این جی کی قلت سے عوام پر تقریباً 20 ارب روپے کا اضافی بوجھ پڑ گیا ہے اس کے باوجود سب اچھا کی رپورٹ دی جارہی ہے ۔ انہوں نے کہا کہ مہنگائی کی شرح جہاں پہنچ چکی ہے اس نے پانچ دہائیوں کے ریکارڈ توڑ دئیے ہیں، حکومتی اعدادوشمار کے مطابق مہنگائی کی شرح 30فیصد ہے جبکہ غیر جانبدار انہ سروے کے مطابق مہنگائی کی شرح 40فیصد سے تجاوز کر چکی ہے ۔ انہوں نے کہا کہ عوام کو دو وقت کی روٹی میسر نہیں اور وفاق میں اتحادیوں کو نوازنے کے لئے درجن بھر مشیروں کو وزیر مملکت کا درجہ دیدیا گیا ہے ،آج پاکستان دیوالیہ ہونے کے قریب ہے لیکن ان کی عیاشیاں ختم ہونے کا نام نہیں لے رہیں۔
