لاہور (نیوز ڈیسک) بالی ووڈ میں اداکار سلمان خان ، نئے آنے والے اداکاروں کے مینٹر کی حیثیت سے معروف ہیں اور اب یہی کردار اداکار شاہ رخ خان نے بھی نبھانا شروع کردیا ہے۔ شاہ رخ کا ٹیسٹ کیس پاکستانی اداکارہ ماہرہ خان بنی ہیں۔ ڈرامہ سیریئل ہم سفر سے شہرت پانے والی اداکارہ ماہرہ خان بالی ووڈ میں فلم رئیس کے ذریعے انٹری دیں گی۔ اس فلم میں وہ شاہ رخ کے مقابل ہی کام کررہی ہیں۔
فلم رئیس کی شوٹنگ کے دوران ماہرہ خان کی شاہ رخ سے خاصی بے تکلفی ہوچکی ہے جس کے بعد شاہ رخ نے انڈسٹری میں ان کی مینٹر کی ذمہ داری رضاکارانہ طور پر اٹھا لی ہے۔ کنگ خان اداکارہ کو فلموں کے حوالے سے مشورے دے رہے ہیں۔ ماہرہ خان کی فلم ریلیز ہونے سے قبل ہی ان کی خوبصورتی کے چرچے بالی ووڈ میں عام ہیں، یہی وجہ ہے کہ فلم ڈائریکٹرز انہیں سائن کرنے کیلئے بیتاب ہیں تاہم شاہ رخ نے انہیں مشہورہ دیا ہے کہ انہیں کوئی بھی فلم سائن کرتے ہوئے کون کون سے پہلو دیکھنے چاہئیں اور کوئی بھی فلم چنتے ہوئے اس میں کون کون سی خوبیوں پر نظر رکھنی چاہئے۔ ماہرہ خان کے بالی ووڈ کیریئر میں شاہ رخ کے یہ مشورے کس حد تک کام آتے ہیں، یہ تو وقت ہی بتائے گا۔