لاہور(این این آئی) چیئرمین رائس ایکسپورٹرز ایسوسی ایشن علی حسام اصغر نے کہا ہے کہ چاولوں کی برآمدات 2 ارب ڈالر سے تجاوز کر گئیں، ہمارا سلوگن چاول کی پیداوار بڑھائو، برآمدات بڑھائو ہے، رائس ایکسپورٹرز چاولوں کی سپلائی چین بڑھانے کے لئے تعلیمی اداروں اور ریسرچرز کے ساتھ مل کر کام کریں گے،ہم دنیا کے 20 بڑے چاول کے امپورٹرز کو پاکستان میں سرکاری سطح پر لائیں گے۔
ان خیالات کا اظہارانہوں نے لاہور اکنامک جرنلسٹس ایسوسی ایشن کے ممبران سے ملاقات کے دوران گفتگو کرتے ہوئے کیا ۔انہوں نے کہاکہ گزشتہ مالی سال کے دوران چاول کی برآمدات کا حجم 36 لاکھ 45 ہزار میٹرک ٹن رہا ۔ باسمتی چاول کی برآمدات 7 لاکھ 34 ہزار اور نان باسمتی 29 لاکھ 10 ہزار میٹرک ٹن رہی، رواں سال اگست میں 28 کروڑ ڈالر کے چاول برآمد کئے گئے۔لا اگست 2021 میں نان باسمتی چاولوں کی برآمدایک لاکھ 28 ہزار اور نان باسمتی 3 لاکھ 44 ہزار میٹرک ٹن رہی۔ چاولوں کے شعبے کو میکانزائزڈ کرنے کی ضرورت ہے جس کے لئے کسانوں کا ہارویسٹرز دئیے جائیں۔ چاولوں کی فصل کو کاشت کرنے کے لئے ہارویسٹرز کی خریداری کے لئے وفاقی حکومت سبسڈی دے۔ کسانوں کو چاول کی فصل پر مخصوص سپرے کرنا چاہیے ۔انہوںنے کہاکہ بھارت کی چاول ایکسپورٹ پر پابندی کا پاکستان کو فائدہ ہوا۔ یورپ میں چاولوں کی برآمدات ڈیڑھ لاکھ میٹرک ٹن سے بڑھ کر تین لاکھ میٹرک ٹن ہو گئی۔ ہمسایہ ملک ایران چاولوں کی بہت بڑی منڈی ہے لیکن ان پر پابندیوں کی وجہ سے چاول ایکسپورٹ نہیں کرسکتے۔ رائس ایکسپورٹرز چاولوں کی سپلائی چین بڑھانے کے لئے تعلیمی اداروں اور ریسرچرز کے ساتھ مل کر کام کریں گے۔انہوںنے کہاکہ ہم دنیا کے 20 بڑے چاول کے امپورٹرز کو پاکستان میں سرکاری سطح پر لائیں گے۔ دنیا کے بڑے خریداروں کو حکومت پاکستان کی جانب سے ایوارڈ دلوائیں گے۔
بھارت کے ساتھ باسمتی چاول کی رجسٹریشن کے حوالے سے کیس چل رہا ہے۔مستقبل قریب میں چاول کی برآمدات میں مزید اضافے کی توقع ہے۔ اس موقع پر سابق چیئرمین رائس ایکسپورٹرز ایسوسی ایشن شہزاد ملک نے کہاکہ بھارت کے پاس چاول کی بے شمار ورائٹی ہے لیکن ہائبرڈ چاول میں ہم ان سے آگے ہیں۔ باسمتی کا ہائیبرڈ بیج پر
ٹرائل جاری ہیں۔ بدقسمتی سے باسمتی چاول کے زیرکاشت علاقوں میں نان باسمتی چاول کاشت ہونا شروع ہو گیا ہے۔ ہائبرڈ نان باسمتی چاول کو پنجاب میں کاشت سے نہ روکا گیا تو باسمتی چاول نایاب ہو جائیں گے۔ہائبرڈ کو روکنے کے لئے باسمتی چاول کی پیداوار کو بڑھانا ہوگا۔ہائبرڈ نان باسمتی کاشت کرنے والے ایک سے ڈیڑھ لاکھ روپے فی ایکڑ کما رہے ہیں۔
