کراچی(مانیٹرنگ ڈیسک /این این آئی) پاکستانی نوجوان سید عماد علی نے بھارتی حریف کو ہرا کر اسکریبل کا عالمی مقابلہ جیت لیا، سید عماد نے دو دفعہ ورلڈ انگلش اسکریبل
چیمپئن شپ یوتھ کپ جیت کر ریکارڈ قائم کردیا۔پاکستان کے سید عماد علی نے ورلڈ یوتھ اسکریبل کپ جیت کر تاریخ رقم کر دی۔کورونا وبا کی وجہ سے عالمی یوتھ اسکریبل چمپئن شپ کے مقابلے آن لائن ہوئے اور پاکستان نے مسلسل دوسری بار ورچوئل چمپئن شپ کی میزبانی کی۔دو روزہ فائنلز میں ٹاپ ٹین کھلاڑیوں نے 13 گیمز کھیلے، اسکریبل ٹورنامنٹ میں پاکستانی ٹیم پہلے نمبر پر رہی۔عماد علی نے فائنلز میں 13 میں سے 9 گیمز میں حریفوں کو چت کیا ،پاکستان کے حشام ہادی خان 7 گیمز جیت کر چوتھے نمبر پر رہے۔سید عماد علی دوسری بار ورلڈ یوتھ اسکریبل چمپئن بنے، عماد نے 2018 میں دبئی میں ہونے والی چمپئن شپ بھی جیتی تھی۔عماد علی دو مرتبہ ورلڈ یوتھ اسکریبل ٹائٹل جیتنے والے دنیا کے پہلے کھلاڑی بن گئے ہیں۔اس کے علاوہ سید عماد علی پاکستان کے سب سیکامیاب اسکریبل کھلاڑی بھی بن گئے ہیں، عماد علی اب تک تین عالمی اعزاز اپنے نام کر چکے ہیں۔سید عماد نے 2 مرتبہ ورلڈ یوتھ اسکریبل کپ اور ایک بار جونیئر ورلڈ چمپئن شپ جیتی۔
