کراچی( آن لائن )پاکستانی بیٹسمین بابر اعظم نے ویرات کوہلی کی کور ڈرائیو کو خود سے بہتر قرار دیدیا۔نیشنل سٹیڈیم، کراچی میں میڈیا سیشن کے دوران بابر اعظم نے کہا کہ میں آسٹریلیا میں اچھی اننگز کھیلنے میں کامیاب ہوا، پاکستان میں بھی فارم برقرار رہی،کراچی میں بھی مداحوں کو
مایوس نہیں کروں گا۔ انھوں نے کہا کہ میں خود پر یقین رکھتے ہوئے محنت کرتا ہوں،یہی میری کامیابی کا راز ہے۔ایک سوال پر انھوں نے کہا کہ کوہلی اور کین ولیمسن کیساتھ نام لئے جانے پر خوشی ہوتی ہے،بھارتی کپتان کا کور ڈرائیو مجھ سے بہتر ہے۔بابراعظم کی پوری دنیا تعریف کرتی ہے جو ناصرف آسٹریلیا میں مرد آہن ثابت ہوئے بلکہ سری لنکا کیخلاف بے نتیجہ رہنے والے راولپنڈی ٹیسٹ میچ میں بھی سنچری سکور کر کے اپنی اہلیت کو ثابت کیا۔بابراعظم کا موازنہ بھارتی کرکٹ ٹیم کے کپتان ویرات کوہلی کیساتھ کیا جاتا ہے اور اب تو غیر ملکی ماہرین کرکٹ بھی اس پر رضامند ہو رہے ہیں کہ بابراعظم میں وہ تمام تر صلاحیتیں موجود ہیں جو ایک بہترین کرکٹر میں ہونی چاہئیں اور وہ کسی طور پر بھی ویرات کوہلی سے کم نہیں، مگر خود بابراعظم اس حوالے سے کیا کہتے ہیں؟مڈل آرڈر بلے باز کا کہنا ہے کہ ویرات کوہلی اب تک بہت سی کامیابیاں حاصل کر چکے ہیں اور بھارت میں انہیں لیجنڈ مانا جاتا ہے۔ایمانداری سے بات کروں تو اس وقت کوہلی اور میرا کوئی موازنہ نہیں ہے لیکن آخر کار میں بھی اسی مقام پر پہنچنا چاہتا ہوں جہاں آج ویرات کوہلی ہے۔
