واشنگٹن(آئی این پی)مریکی صدر ڈونلڈ ٹرمپ نے شمالی کوریا کی جانب سے ایٹمی مذاکرات پر آمادگی کو مثبت قرار دیتے ہوئے کہا ہے کہ یہ عالمی ممالک اور شمالی کوریا کے لیے خوش آئند ہے۔غیر ملکی میڈیا کے مطابق وائٹ ہاوس میں میڈیا سے بات چیت میں صدر ٹرمپ کا کہنا تھا کہ شمالی کوریا کی جانب سے ایٹمی مذاکرات پر آمادگی بہت خوش آئند ہے ،شمالی کوریا مثبت اقدام کررہا ہے اور ابھی ہمیں اس حوالے سے دیکھنا ہوگا۔

تاہم امریکا کے پاس تمام آپشنز موجود ہیں۔صدر ٹرمپ کا کہنا تھا کہ انہیں یقین ہے کہ شمالی کوریا کی جانب سے ایمانداری کے ساتھ مذاکرات کی پیشکش کی گئی ہے اور امریکا اس حوالے سے اقدامات کرے گا تاکہ یہ صورت حال خراب نہ ہو۔ادھر سوئیڈن کے وزیر اعظم اسٹیفن لوفن سے ملاقات کے بعد نیوز کانفرنس میں ٹرمپ نے کہا کہ 2016 کے انتخابات میں روس اور دیگر ممالک نے مداخلت کی تھی تاہم اس سال کے آخر میں ہونے والے مڈٹرم انتخابات میں مداخلت کی کوشش کی گئی تو اس کا جواب دیا جائے گامگرروسی مداخلت امریکی ووٹنگ پر اثر انداز نہیں ہوئی تھی۔