راولپنڈی (این این آئی)آرمی چیف پاک افغان سرحد پر اگلے مورچوں میں پہنچ گئے،ملک دشمنوں کیخلاف بڑا اعلان کردیا،
چیف آف آرمی سٹاف جنرل راحیل شریف نے اعلان کیا ہے کہ ملک بھر سے دہشتگردو ں اور انکے سلیپرز سیل کے خاتمے تک کارروائیاں جاری رکھیں گے،انہوں نے دہشتگردی کیخلاف جنگ میں شریک فوجیوں کے بلند جذبے ،پیشہ ورانہ مہارت اور آپریشن کی پیش رفت رپر اطمینان کا اظہار کیا ۔ آئی ایس پی آر کے مطابق آرمی چیف نے خیبر ایجنسی میں پاک افغان سرحد کے ساتھ اگلے مورچوں کا دورہ کیا اور آپریشنز میں مصروف فوجیوں سے ملاقات کی ۔ آرمی چیف کو آپریشنل کمانڈر کی جانب سے جاری آپریشنز اور ابتک حاصل ہونیوالی کامیابیوں کو مستحکم کرنے کے حوالے سے تفصیلی بریفنگ دی گئی۔ آپریشن کی پیش رفت پر اطمینان کا اظہار کرتے ہوئے آرمی چیف نے مختلف تنظیموں کے چھپے ہوئے دہشتگردوں کا مقابلہ کرنے والے فوجیوں کے بلند جذبے اور پیشہ ورانہ مہارت کو سراہا ۔ انہوں نے کہا کہ راجگال کے دشوار گذار اور غیر ہموار پہاڑی دروں کو کلیئر کرانا پاکستان کی طرف سے سرحد کے آر پار دہشتگردوں کی نقل و حرکت روکنے کے عزم کا اظہار ہے اور اس سے بارڈر مینجمنٹ پر عملدرآمد یقینی بنانے میں مدد ملے گی ۔ پاک فوج کے سربراہ نے دہشتگردوں کی کسی بھی طرح کی نقل و حرکت روکنے کیلئے نگرانی بڑھانے اور فعال طرز فکر اختیار کرنے کی ہدایت کی ۔ اس موقع پر فوجیوں سے گفتگو کرتے ہوئے آرمی چیف نے کہا کہ قوم اور بہادر فوج نے دہشتگردی کیخلاف جنگ کی بھاری قیمت ادا کی ہے اور ہم ملک بھر سے دہشتگردوں کے مکمل خاتمے تک تمام دور دراز علاقوں سے دہشتگردوں کو نکالنے اور انکے سلیپرز سیلز کو کلیئر کرانے کیلئے تمام وسائل بروئے کار لتے رہیں گے ۔ قبل ازیں اگلے مورچوں پر آمد کے موقع پر آرمی چیف کا استقبال کور کمانڈر پشاور لیفٹیننٹ جنرل ہدایت الرحمان نے کیا ۔