اسلام آباد (این این آئی)شوگر مافیا کے بعد آئی پی پیز کی طرف سے بھاری منافع جات حاصل کرنے کا معاملہ،حکومت نے آئی پی پیز سے بجلی کی قیمت کم کروانے کیلئے نئی کمیٹی تشکیل دے دی ۔ذرائع وزیر اعظم آفس کے مطابق کمیٹی کے قیام کی منظوری کابینہ کی توانائی کمیٹی نے دی ،

کمیٹی سابق وفاقی سیکریٹری بابر یعقوب کی سربراہی میں قائم کی گئی ہے ۔ ذرائع کے مطابق بابر یعقوب سکرٹری الیکشن کمیشن اور چیف سیکرٹری بلوچستان سمیت کئی اہم عہدوں پر کام کر چکے ہیں ۔ ذرائع کے مطابق کمیٹی اراکین میں آئی پی پیز رہورٹ تیار کرنے والی کمیٹی کے سربراہ محمد علی بھی شامل ہیں۔ ذرائع کے مطابق دیگر اراکین میں خیبر پختونخواہ سے تعلق رکھنے والے ایک معروف وکیل بیرسٹر قاسم ودود اور پاور ڈویژن کے ایک جائنٹ سیکرٹری شامل ہیں ،نئی کمیٹی کے قیام کا نوٹیفکیشن وفاقی کابینہ سے منظوری کے بعد جاری کیا جائے گا ، نئی کمیٹی محمد علی کمیٹی رپورٹ کی روشنی عید کے بعد آئی پی پیز سے بات چیت شروع کرے گی ۔ ذرائع کے مطابق وزیر اعظم کے معاون خصوصی قاسم شہزاد کی سربراہی میں آئی پی پیز سے بات چیت کیلئے قائم ٹیکنکل کمیٹی بھی کام کرتی رہے گی ۔ ذرائع نے بتایاکہ شہزاد قاسم کی سربراہی میں قائم کمیٹی کا کام سرکاری شعبے کے بجلی گھروں تک محدود ہو جائے گا ،یہ ٹیکنکل کمیٹی رپورٹ سے متعلق آئی پی پیز سے بات چیت نہیں کرے گی ۔

موضوعات:بجلی کی قیمت کم کروانے کیلئے اہم قدم اٹھا لیا