لاہور(آئی این پی)پاکستان سپر لیگ کے چیئرمین نجم سیٹھی نے فرنچائز مالکان سے اپنی ٹیم میں چار غیرملکی کھلاڑیوں کو ہر صورت شامل کرنے کی اپیل کی ہے۔تفصیلات کے مطابق پاکستان سپر لیگ کے چیئرمین نجم سیٹھی نے سماجی رابطے کی ویب سائٹ ٹوئیٹر پر اپنے پیغام میں کہا کہ فرنچائز مالکان اپنی ٹیموں میں چار غیر ملکی کھلاڑیوں کی شمولیت کو یقینی بنائیں۔
انھوں نے کہا کہ فرنچائز مالکان چاروں کیٹیگریز میں ایسے کھلاڑیوں کا انتخاب کر سکتے ہیں جنھوں نے پی ایس ایل کھیلنے کی حامی بھری تھی۔دریں اثنا انھوں نے آفیشل اکاؤنٹ سے ٹوئیٹ کو بھی ری ٹوئیٹ کیا جس میں عوام کو بتایا گیا تھا کہ لوگوں کی دلچسپی کو دیکھتے ہوئے پی ایس ایل کی مزید ٹکٹیں جاری کی جائیں گی۔ جمرات سے بینک آف پنجاب کے ذریعے شائقین کو پی ایس ایل کی مزید ٹکٹیں جاری کی جائیں گی۔
