بھارتی ویب سائٹ ’’ انڈیا وائر‘‘ نے شاہد آفریدی اور بھارتی ماڈل سے مبینہ دوستی کی خبر نشر کی ہے ۔ ویب سائٹ کیمطابق شاہد آفریدی اور گمنام بھارتی ماڈل کافی عرصے سے ایک دوسرے کے دوست ہیں ۔ پاکستانی اسٹار کیخلاف خبر نے ماڈل اور ویب سائٹ دونوں کو شہرت دلا دی ہے ۔ بھارتی ویب سائٹ نے بے بنیاد الزام عائد کرتے ہوئے کہا ہے کہ بوم بوم آفریدی اور بھارتی ماڈل عرشی خان دبئی کے سیون اسٹار ہوٹل میں ایک ساتھ نظر آئے تھے ۔
جبکہ دو دن تک ان کی ملاقاتوں کا سلسلہ بھی جاری رہا ۔ قابلِ غور بات یہ ہے کہ بھارتی ویب سائٹ نے یہ خبر اپنے ذرائع کے حوالے سے دی ہے ۔ جبکہ پروپیگینڈے کے ذریعے سستی شہرت حاصل کرنے والی انڈیا وائر کی ویب سائٹ نے شاہد آفریدی اور ماڈل کی ایک تصویر تک شائع نہیں کی ۔ ویب سائٹ کا کہنا ہے کہ بھوپال سے تعلق رکھنے والی ماڈل نے اب ممبئی میں رہائش اختیار کر لی ہے ۔ جبکہ وہ ہر دو تین ماہ بعد دبئی کا دورہ کرتی ہے ۔
ویب سائٹ میں کہا گیا ہے کہ شاہد آفریدی اور عرشی خان روزانہ فون اور ایس ایم ایس پر ایک دوسرے سے رابطے میں رہتے ہیں ، جبکہ آفریدی ماڈل کو ہر روز کم از کم تین سے چار میسجز بھیجتے ہیں ۔ انڈیا وائر نے اپنی رپورٹ میں کہا ہے کہ انہوں نے معاملے کی تصدیق کے لیے عرشی خان سے رابطہ کیا ، مگر ماڈل نے کسی بھی قسم کے تبصرے سے گریز کیا ۔ جبکہ شاہد آفریدی سے رابطہ نہیں ہوسکا ، اس خبر کے بعد ایک اور بھارتی ویب سائٹ نے نے بھی بہتی گنگا میں ہاتھ دھونے شروع کر دیئے ہیں ۔ ’’ بالی ووڈ مانترا‘‘ نے اپنی رپورٹ میں دعویٰ کیا ہے کہ عرشی خان نے آفریدی کیساتھ تعلقات کی تصدیق کرتے ہوئے بتایا کہ ان دونوں کے درمیان پہلی ملاقات ممبئی کے تاج محل ہوٹل میں ہوئی تھی ۔
عرشی خان کا کہنا تھا کہ اس کے بعد سے وہ اور آفریدی ایک دوسرے کیساتھ رابطے میں ہیں ، تاہم انہوں نے آفریدی سے دبئی میں ملاقات کی تصدیق نہیں کی ۔ ماڈل کا مزید کہنا تھا کہ دبئی میں اس کے بےشمار دوست اور رشتے دار موجود ہیں ۔ اس لیے وہ اکثر دبئی کا دورہ کرتی ہیں ، جبکہ بہت سے پاکستانی کرکٹرز دبئی آکر شاپنگ اور پارٹی کرتے ہیں اور ان سے ملاقات بھی رہتی ہے ۔