لاہور(نیوزڈیسک)پاکستان بمقابلہ بنگلہ دیش ون ڈے سیریزمیں کس نے کیا کارکردگی دکھائی؟۔بنگلہ دیش کے خلاف ون ڈے سیریزمیں پہلی بار پاکستانی ٹیم کو شکست کا سامنا کرنا پڑا اور بنگلہ دیش نے تین صفر سے کامیابی حاصل کی۔ اس سیریز میں کھلاڑیوں کی انفرادی کاکردگی کیا رہی، بیٹنگ اوربولنگ میں بنگلہ دیشی کھلاڑی چھائے رہے۔بیٹنگ کے شعبے میں دیکھا جائے تو پہلی دو پوزیشنز بنگلہ دیشی بلے بازوں نے حاصل کیں۔ بنگلہ دیشی اوپنر تمیم اقبال تین میچوں میں دو سنچریوں اور ایک نصف سنچری کے ساتھ 312 رنز بنا کر سرفہرست رہے۔ بنگلہ دیش ہی کے مشفیق الرحیم 220 رنز کے ساتھ دوسرے نمبر پر رہے۔ پاکستانی کپتان اظہر علی نے بلے بازوں میں تیسری پوزیشن حاصل کی، انہوں نے ایک سنچری اور ایک نصف سنچری کی بدولت 209 رنز بنائے۔ چوتھی پوزیشن بنگلہ دیش کے سومیا سرکار اور پانچویں پاکستان کے حارث سہیل نے حاصل کی۔ حارث سہیل نے 147رنز بنائے۔سعد نسیم نے 99، محمد رضوان 84، وہاب ریاض 66 اورسمیع اسلم45 رنز بنا سکے۔ سرفراز احمد نے 2 میچوں میں 31 رنز بنائے۔ فواد عالم نے 3 میچوں میں 18 اور محمد حفیظ نے 8 رنز بنائے۔ بولنگ میں بھی بنگلہ دیشی کھلاڑیوں کو برتری حاصل رہی۔ عرفات سنی نے 3 میچوں میں 6 جبکہ شکیب الحسن نے 3 میچوں میں 5 وکٹیں حاصل کیں۔ بنگلہ دیش کے روبیل حسین اور پاکستان نے وہاب ریاض نے 4،4 وکٹیں حاصل کیں۔ جنید خان 3، راحت علی نے 2 اور سعید اجمل نے صرف ایک وکٹ حاصل کی۔