لاہور( این این آئی) استحکام پاکستان پارٹی نے آئندہ انتخابات میں بھرپورشرکت اورفوری طور پرصوبوں اورضلعی سطح پر پارٹی کی تنظیم سازی شروع کرنے کا فیصلہ کیا ہے۔سینئرسیاستدان جہانگیرخان ترین کی زیرصدارت استحکام پاکستان پارٹی کا پہلا باضابطہ اجلاس ہوا
جس میں پارٹی کے پیٹرن انچیف جہانگیرخان ترین نے ویڈیو لنک کے ذریعے شرکت کی۔اجلاس میں پارٹی صدرعبدالعلیم خان ، سیکرٹری جنرل عامرکیانی، عون چودھری، فردوس عاشق اعوان، مراد راس، سعیداکبرنوانی ،شعیب صدیقی،سید سعیدالحسن شاہ، نعمان لنگڑیال اور اجمل چیمہ سمیت دیگر نے شرکت کی۔اجلاس میں آئندہ انتخابات میں بھرپورشرکت کرنے اور فوری طور پر ملک بھر میں پارٹی کی تنظیم سازی شروع کرنے کا فیصلہ کیا گیا ۔اس موقع پر پارٹی صدر عبدالعلیم خان نے خطاب کرتے ہوئے کہا کہ ملک میں سیاسی استحکام کیلئے کام کررہے ہیں،ملکی مسائل دیکھتے ہوئے مستقبل کالائحہ عمل مرتب کررہے ہیں،امیدسے عمل تک قوم کاساتھ دیں گے۔عبدالعلیم خان نے کہا کہ استحکام پاکستان پارٹی نے آئندہ انتخابات میں بھر پور شرکت کرنے اورصوبوں اورضلعی سطح پرفوری تنظیم سازی شروع کرنے کا فیصلہ کیا ہے۔
