اسلا م آبا د(این این آئی)وفاقی وزیر برائے نیشنل ہیلتھ سروسز ریگولیشن اینڈ کوارڈینیشن عبد القادر پٹیل نے کہا ہے کہ گلوبل فنڈ نے پاکستان کے ٹی بی اور ملیریا پروگرام کیلئے 282 ملین ڈالر زگرانٹ کی منظوری دیدی ہے۔اپنے بیان میں انہوں نے کہا کہ کامن مینجمنٹ یونٹ کی ٹیم اور وزارت صحت کے افسران خصوصی مبارکباد کے مستحق ہیں۔
انہوں نے کہا کہ کامن مینجمنٹ یونٹ کو مزید مضبوط اور اس کی استعداد کار کو مزید بڑھائیں گے۔وزارت صحت کی کوششیں رنگ لے آئیں۔منظوری گلوبل فنڈ کی ٹیکنیکل ریویو کمیٹی کی منظوری کے بعد ہوئی۔انہوں نے کہا کہ گرانٹ ٹی بی اور ملیریا جیسی بیماری کو ختم کرنے میں موثر ثابت ہو گی ۔انہوں نے کہا کہ 2003 سے اب تک پہلی مرتبہ پاکستان کی فنڈنگ درخواست کو گلوبل فنڈ کی پہلی ونڈو میں منظوری دی گئی۔عبد القادر پٹیل نے کہا کہ میں گلوبل فنڈ کی ٹیم کا بھی مشکور ہوں جنہوں نے پاکستان کے کیس کو لڑا ہے۔ڈبلیو ایچ او یو ایس ایڈ یونیسف یو این ایڈز کے ڈونرز کا بھی مشکور ہوں،ان اداروں نے گرانٹ حاصل کرنے میں پاکستان کو تکنیکی مدد دی ،وزارت صحت عوام کو بیماریوں سے محفوظ رکھنے کیلئے تمام تر وسائل بروئے کار لا رہی ہے۔ انہوں نے کہا کہ عوام کی خدمت ہمارا مشن ہے اور صحت کا شعبہ بہتری کی جانب گامزن ہے۔
