مریدکے(این این آئی)اٹلی کشتی حادثہ کا شکار ہونے والوں میں دو نوجوانوں کا تعلق مریدکے سے ہے،دونوں آپس میں کزن اور شادی شدہ ہیں،ایک بچ گیا،ایک کی ہلاکت ہوگئی،متاثرہ خاندان سوگ میں مبتلا ہے،گھروں میں قیامت ہے،حکومت نے رابطہ نہ کیا،ایجنٹ نے جاں بحق بیٹے کی لاش واپس لانے کیلئے پچیس لاکھ روپے کی ڈیمانڈ کردی۔
تفصیلات کے مطابق اٹلی کشتی حادثہ میں جاں بحق اور زندہ بچ جانے والے دو نوجوانوں حشام بٹر اور ذوالقدر مان جو کہ آپس میں کزن ہیں کا تعلق مریدکے کی آبادی کنال پارک سے ہے۔ذوالقدر مان کا نکاح بارہ روز قبل ہوا تھا جبکہ حشام بٹر کا نکاح ایک سال قبل ہوا تھا۔دونوں کی دلہنوں کی رخصتی ابھی ہونا تھی جاں بحق حشام بٹر کے بوڑھے باپ محمد مالک بٹر نے بتایا کہ وہ زمیندار ہیں اللہ تعالی نے بہت نواز رکھا ہے اسکے بیٹے حشام بٹر نے ایم کام کررکھا تھا وہ اور اسکا کزن ذوالقدر گجرات کے ایک ایجنٹ کے ہاتھ چڑھ گئے جنہوں نے مستقبل کے سہانے خواب دکھا کر انکے لخت جگروں کو اپنے جال میں پھنسایا۔بیس لاکھ روپے فی کس لیکر پہلے روس اور پھر لیبیا اور لیبیا سے بذریعہ کشتی اٹلی لیکر جانا تھا۔اٹلی روانگی سے قبل انکے لخت جگروں کو قید کرکے تشدد کیا اور ستر لاکھ روپے فی کس کی ڈیمانڈ کردی جو انہوں نے گجرات میں ایجنٹ کے ماموں کی سنار کی دکان پر جاکر ادا کئے۔اسکے بعد رابطہ منقطع ہوگیا اور ذوالقدر مان نے فون کرکے بتایا لیبیا سے اٹلی جاتے کشتی ڈوب گئی ہے وہ بچ گیا ہے،دیگر لڑکوں کیساتھ حشام بٹر کی موت واقع ہوگئی ہے،یہ اطلاع انکے خاندان پر بجلی بن کر گری اور گھروں میں صف ماتم بچھ گیا۔جاں بحق حشام بٹر اور زندہ بچ جانے والے ذوالقدر مان کے کزن چوہدری شاہد چٹھہ نے بتایا حشام بٹر اور ذوالقدر مان انکے کزن ہیں،دونوں بڑے ملنسار اور خوش مزاج ایک دوسرے کے بغیر نہیں رہتے تھے
انکے خاندان پر قیامت گزر گئی کوئی حوصلہ دینے تک نہ آیا ہے۔جاں بحق حشام بٹرچھ بہن بھائی ہیں،گھر میں سب سے بڑا تھا جبکہ زندہ بچ جانے والا ذوالقدر مان چار بہن بھائی ہیں،گھر میں یہ سب سے بڑا تھا۔جاں بحق حشام بٹر اور زندہ بچ جانے والے ذوالقدر کے ماموں چوہدری عدنان نذیر نے بتایا کہ وفاقی وزیر تعلیم رانا تنویر مریدکے کے ہیں ان سمیت حکومت کی طرف سے
آج تک کسی نے انکے ساتھ رابطہ نہیں کیا،پہلے لاکھوں کی نقدی پھر ایک بیٹا مارا گیا،ایک اٹلی میں پریشان ہے اب ڈیڈ باڈی لانے اور زندہ بچ جانے والے بیٹے کی واپسی کیلئے وہ پریشان ہیں اور ایجنٹ پچیس لاکھ روپے مانگ رہے ہیں،انکی وزیر اعظم شہباز شریف اور دیگر متعلقہ اداروں سے اپیل ہے کہ انکی مدد کی جائے اور انکے جاں بحق اور زندہ بچ جانے والے لخت جگر کی واپسی کا احتمام کیا جائے۔
