سری لنکن سٹار دنیش چندیمل بھی قومی کپتان بابراعظم کی صلاحیتوں کے معترف نکلے

کولمبو (این این آئی)سری لنکن کرکٹر دنیش چندی مل نے کہا ہے کہ پاکستان نے گزشتہ دو سال میں زبردست کرکٹ کھیلی ہے۔ایک انٹرویومیں چندی مل نے کہا کہ بابر اعظم بہترین کھلاڑی ہیں، وہ مسلسل رنز کر رہے ہیں،ہار جیت تو کھیل کا حصہ ہے، مجھے یقین ہے پاکستان ہمیشہ سخت حریف رہے گی۔انہوںنے کہاکہ رواں سال بھی سری لنکن ٹیم کو پاکستان سے سخت چیلنج کی توقع ہے، گزشتہ سیریز میں بھی پاکستان نے سری لنکا کے خلاف شاندار کھیل پیش کیا تھا۔دنیش چندی مل نے کہا کہ پلیئرز کسی کی بھی تنقید کو کنٹرول نہیں کرسکتے ، پلیئرزکے ہاتھ میں جو ہے وہ ہے ان کی کارکردگی اور ان کی فٹنس، کارکردگی پر فوکس کرنا ہے تو سوشل میڈیا کی باتوں پر توجہ نہ دیں۔انہوںنے کہاکہ دنیا بھر میں ہونے والی لیگز ہر کھلاڑی کیلئے کم بیک کا بھی موقع ہوتی ہیں،پلیئرز دنیا کی دیگر مختلف ملکوں کی کنڈیشنز سے بھی سیکھتے ہیں۔