راولپنڈی (این این آئی)لاہور ہائیکورٹ راولپنڈی بینچ نے سانحہ مری کیس کا فیصلہ سْنا دیا جس میں حکم دیا گیا ہے کہ سانحہ مری کے شہدا کا معاوضہ بڑھایا جائے۔ بدھ کو عدالت نے اپنے فیصلے میں کہا کہ سانحہ مری میں جن لوگوں کی شہادتیں ہوئیں ان کا معاوضہ بڑھایا جائے۔حکم نامے میں کہا گیا کہ مری میں سیوریج،

پانی اور ویسٹ مینجمنٹ کا نظام بہتر بنایا جائے، مری میں غیر قانونی تعمیرات اور درختوں کی کٹائی پر پابندی عائد کی جائے۔عدالتی فیصلے میں کہا گیا کہ محکمہ ہائی وے، محکمہ ڈیزاسٹر مینجمنٹ اور ریسکیو 1122 کو سانحے کے ذمہ داروں کے خلاف انکوائری کا حکم دیا جائے۔عدالت نے ضلعی انتظامیہ کو پارکنگ سائٹس مری سے باہر بنانے، تجاوزات ختم کروانے، ہوٹلز اور رہائشی فلیٹس ریگولیٹ کرنے کی ہدایت کردی۔فیصلے میں قرار دیا گیا ہے کہ سانحہ کے بعد جنہیں بلا جواز معطل کیا گیا، ان کے خلاف کسی قسم کی کوئی کارروائی نہیں ہوگی جب کہ ذمہ دار قرار دیے گئے ریسکیو1122،ہائی وے اور پنجاب ڈیزاسٹر مینجمنٹ کے افسران خلاف کارروائی کی جائے۔ذرائع کے مطابق 80 صفحات پر مشتمل تفصیلی فیصلہ پیر 7 نومبر کو جاری ہوگا۔ فیصلے کے مطابق مری میں تمام غیر قانونی عمارتیں مسمار ہوں گی جبکہ تمام کمرشل تعمیرات پر پابندی لگا دی گئی ہے۔ عدالت نے حکم دیا کہ ہوٹلز کا میکنزم بنایا جائے اور مری کے ہوٹلز،گیسٹ ہاؤسز کی کیٹگریز بنا کر کرایے مقرر کیے جائیں۔یاد رہے کہ 7 اور 8 جنوری کو پیش آنے والے سانحہ مری میں 23 افراد جاں بحق ہو گئے تھے۔

موضوعات:لاہور ہائیکورٹ