اسلام آباد (مانیٹرنگ، این این آئی) شبلی فراز کو عمران خان کا قائم مقام چیف آف اسٹاف مقرر کر دیا گیا ہے، اعلامیہ کے مطابق شبلی فراز فوری طور پر قائم مقام چیف آف اسٹاف چیئرمین پی ٹی آئی ذمہ داریاں سنبھالیں گے۔ دوسری جانب پی ٹی آئی کے سینئر رہنماء

سینیٹر شبلی فراز نے کہا ہے پارٹی عمران خان کے ساتھ کھڑی ہے لوگ سیاسی طور پر تحریک انصاف کا مقابلہ نہیں کرسکتے،ملک میں شدید قسم کا بحران آنے والا ہے، سیاسی عدم استحکام کا واحد حل نئے الیکشن ہیں۔پاکستان تحریک انصاف کے رہنما اور سینیٹر شبلی فراز نے اسلام آباد میں میڈیا سے گفتگو کرتے ہوئے کہا ہے کہ یہ ملک ہمارا ہے اور عوام کے ادارے عوام کی خدمت کیلئے ہوتے ہیں، جب کہ اس وقت ملک پر حکمران عوام کے لئے نہیں بلکہ اپنے کیسز ختم کرنے آئے ہیں، یہ صرف اپنی بیرون ملک بنائی گئیں جائیدادیں بچانا چاہتے ہیں، انہیں پاکستان کیعوام کی حمایت حاصل نہیں ہے۔شبلی فراز نے کہا کہ حکمرانوں کو نظر نہیں آرہا کہ عوام مہنگائی میں پس رہے ہیں، ملک میں غریب کا کوئی پرسان حال نہیں ہے، یہ مہنگائی اور معاشی صورتحال سے توجہ ہٹانے کی کوشش کر رہے ہیں۔ انہوں نے کہا کہ اس ملک میں مانگے تانگے کی حکومت بنتی رہی ہے، اب عوام کو ایک نڈر لیڈر ملا ہے، جس سے سب کی سانسیں اکھڑ رہی ہیں، اب بھی وقت ہے، ملک میں شدید قسم کا بحران آنے والا ہے، عوام کا ردعمل انہوں نے دیکھ لیا اب ملک میں فوری الیکشن ہونے چاہئیں کیونکہ سیاسی عدم استحکام کا واحد حل یہی ہے کہ عوام کے پاس جائیں اور انہیں بلا خوف وخطر اپنے نمائندے منتخب کرنے دیں۔