اسلام آباد،کراچی ( آن لائن) اسلام آباد ہائی کورٹ میں چیئرمین تحریک انصاف عمران خان کی نا اہلی کیلئے درخواست دائر کردی گئی ۔اسلام آباد کے شہری محمد ساجد نے ہائیکورٹ میں درخواست دائر کی ۔درخواست میں شہری نے موقف اپنایا کہ عمران خان نے کاغذات نامزدگی میں معلومات چھپائیں، بیٹی ٹائیریان کو کاغذات نامزدگی میں ظاہر نہیں کیا۔
عمران خان پہلے ٹائیریان سے متعلق تردید کرتے تھے ،عمران خان اب ٹائیریان سے متعلق سوال کا جواب نہیں دیتے، عمران خان جانتے ہیں ان کیخلاف ثبوت موجود ہیں ،عمران خان پبلک آفس یا پارٹی سربراہ کا عہدہ نہیں رکھ سکتے، عمران خان سے پوچھا جائے ان پر آرٹیکل 62ون ایف کا اطلاق کیوں نہ ہو؟ دوسری جانب قومی اسمبلی کے حلقہ این اے 246 لیاری میں ضمنی انتخابات کے لیے چیئرمین پی ٹی آئی عمران خان کے کاغذات نامزدگی کی منظوری کو سندھ ہائی کورٹ میں چیلنج کردیا گیاہے۔تفصیلات کے مطابق ایم کیو ایم کے امیدوار طیب ہاشمی نے پی ٹی آئی چیئرمین عمران خان کے کاغذات نامزدگی کی منظوری کو سندھ ہائیکورٹ میں چیلنج کیا ہے، جس میں موقف اپنایا گیا ہے کہ ریٹرننگ افسر نے حقائق کو نظر انداز کرکے کاغذات نامزدگی منظور کیے۔اپیل میں کہا گیا ہے کہ عمران خان نے گوشواروں میں زرعی زمین چھپائی۔ عمران خان نے اپنے بینک اسٹیٹمنٹ بھی چھپائے۔ عمران خان اور ان کی اہلیہ القادر ٹرسٹ کے بینیفشری ہیں، لیکن کاغذات میں کوئی ذکر نہیں۔ الیکشن کمیشن نے فارن فنڈنگ کیس کا فیصلہ عمران خان کے خلاف سنایا تھا۔ عمران خان نے جھوٹا حلف نامہ الیکشن کمیشن میں جمع کرایا تھا۔درخواست میں کہا گیا ہے کہ این اے 108 فیصل آباد کے ریٹرننگ آفیسر نے انہی حقائق کے باعث کاغذات مسترد کیے۔ اپیل میں استدعا کی گئی ہے کہ ریٹرننگ افسر کا فیصلہ کالعدم قرار دیتے ہوئے این اے 246 سے عمران خان کے کاغذات مسترد کیے جائیں۔
