پاکپتن (مانیٹرنگ، این این آئی) چیئرمین تحریک انصاف عمران خان نے پاکپتن میں حضرت بابا فرید الدین گنج شکرؒ کے دربار پر حاضری دی، اس موقع پر عوام کا ایک جم غفیر وہاں موجود تھا، روزنامہ جنگ کی رپورٹ کے مطابق عمران خان رش کی وجہ سے مزار کے
اندر نہ جا سکے، موقع پر موجود زائرین نے عمران خان کا پرتپاک استقبال کیا اور نعرے لگائے، عمران خان کو جب بتایاگیاکہ اندر بہت رش ہے تو انہوں نے کہاکہ میں کسی کو تکلیف نہیں دینا چاہتا، عمران خان نے بہشتی دروازہ کی چوکھٹ پر سجدہ اور دعا بھی کی جس کی ویڈیو وائرل ہو گئی، خبر رساں ایجنسی کے مطابق چیئرمین پی ٹی آئی عمران خان نے پاکپتن میں پاکپتن میں حضرت بابا فرید الدین گنج شکرؒ کے دربار پر حاضری دی اور مزار پر پھولوں کی چادر چڑھائی۔ عمران خان نے ملکی ترقی،خوشحالی اور امن وامان کیلئے خصوصی دعا کی اور عرس کی تقریبات میں بھی شرکت کی۔ چیئرمین پی ٹی آئی کی آمد کی اطلاع پر ضلعی صدر تحریک انصاف ریاض ارشد نیازی کی قیادت میں کارکنان کی بڑی تعداد دربار پر پہنچ گئی اور عمران خان کا استقبال کیا۔ شہریوں کا سمندر عمران خان کے گرد امڈ آیا، اس موقع پر پولیس کی جانب سے سیکورٹی کے سخت انتظامات کیے گئے تھے۔چیئرمین پی ٹی آئی عمران خان کا پاکپتن سے واپسی پر ملتان روڈ پر شاندار استقبال کیا گیا، کارکنان نے عمران خان پرپھولوں کی پتیاں نچھاورکیں۔
