مفتاح اسماعیل نے جلد آئی ایم ایف سے معاہدہ ہونے کی خوشخبری سنا دی
اسلام آباد(این این آئی)پاکستان اور آئی ایم ایف کے درمیان اسٹاف سطع کا معاہدہ طے پا گیا جس کا باضابطہ اعلان جلد متوقع ہے۔
ذرائع وزارت خزانہ کے مطابق معاہدے کا اعلان آئندہ چوبیس گھنٹوں میں بھی ہو سکتا ہے، اعلان کے بعد آئی ایم ایف بورڈ میں
منظوری کے لیے پیش کیا جائیگا۔آئی ایم ایف بورڈ کی منظوری کے بعد پاکستان کو آئی ایم ایف سے قرض کی اگلی قسط موصول ہوگی،
پاکستان کو آئی ایم ایف سے اگلی دو قسطیں ایک ساتھ ملنے کی توقع ہے۔آئی ایم ایف کے ساتھ پروگرام ٹریک پر آنے سے عالمی بینک
اور ایشیائی ترقیاتی بینک سمیت دیگر ڈونر سے بھی رکی ہوئی فنانسنگ ملنا شروع ہو جائے گی۔نجی ٹی وی سے گفتگو میں
وزیر خزانہ مفتاح اسماعیل نے کہا کہ اس وقت اس سے زیادہ کچھ نہیں کہہ سکتا کہ آئی ایم ایف کے ساتھ معاہدہ جلد ہو جائے گا۔
وزیر خزانہ مفتاح اسماعیل نے بتایا کہ میمورنڈم آف اکنامک اینڈ فنانشل پالیسیز (ایم ای ایف پی) جلد آئی ایم ایف کو بجھوایا جا رہا ہے۔
واضح رہے کہ ایک ہفتہ قبل وفاقی وزیر برائے پیٹرولیم و توانائی مصدق ملک نے کہا تھا کہ آئی ایم ایف سے معاملات ایک سے ڈیڑھ ہفتے میں طے ہوجائیں گے۔
