پی ٹی آئی رہنما عالیہ حمزہ ملک پارلیمنٹ کے دروازے پر چڑھ گئیں،ہاتھ اور پاؤں زخمی
اسلام آباد (این این آئی)پاکستان تحریک انصاف کی خواتین ارکان نے پارلیمنٹ ہاؤس کے باہر احتجاج کیا، عالیہ حمزہ ملک پارلیمنٹ کے دروازے پر چڑھ گئیں،
عالیہ حمزہ کے پاؤں اور ہاتھ پر زخم آئے ہیں۔پی ٹی آئی کی مستعفی خواتین ارکان اسمبلی احتجاج کرنے پارلیمنٹ ہاؤس پہنچیں جہاں عالیہ حمزہ، کنول شوزب،
ملیکہ بخاری کی زیر قیادت پی ٹی آئی کی خواتین نے مظاہرہ کیا۔ذرائع کا کہنا ہے کہ پی ٹی آئی اراکین کے احتجاج سے پولیس اور انتظامیہ بے خبر رہی۔
پی ٹی آئی کی خواتین اراکین پارلیمنٹ گیٹ نمبر ایک سے پارلیمنٹ میں داخل ہوئیں، پی ٹی آئی کی خواتین نے پلے کارڈز اٹھا رکھے تھے،
خواتین اراکین نے مہنگائی کے خلاف نعرے بازی بھی کی۔پاکستان تحریک انصاف کی رہنما ایم این اے عالیہ حمزہ نے کہا کہ ہم پر امن احتجاج کرنے آئے تھے،
ہمیں روکنے کی کوشش کی گئی، پولیس نے دھکے دئیے۔عالیہ حمزہ ملک نے کہا کہ استعفے دے چکے ہیں،احتجاج کرنا ہمارا حق ہے۔
رہنما پی ٹی آئی کنول شوزب نے کہا کہ حکومت کے خلاف پر امن احتجاج کرنے آئے تھے، ہمارے استعفے کی تصدیق اسپیکر قومی اسمبلی نے کر دی تھی، ہماری آواز کو دبا نہیں سکتے۔
