اسلام آ باد (آئی این پی ) قومی اسمبلی میں قائد حزب اختلاف راجہ ریاض احمد نے کہا ہے کہ عمران خان کے ملکی سلامتی کے حوالے سے جاری بیان کی مذمت کرتا ہوں،عمران خان اقتدار کے لا لچ میں اندھے ہوچکے ہیں،پاکستان ایٹمی پروگرام اور ملکی سالمت کے خلاف اوچھے ہتھکنڈوں پر اتر آئے ہیں۔

پاکستان کے تین ٹکڑوں کی خواہش عمران خان کی ذہنی اختراع ہے۔ عمران خان کے بیان پر ردعمل دیتے ہوئے راجہ ریاض احمد نے کہا اسلام کے نام پر بنا پاکستان انشاء تا قیامت قائم و دائم رہے گا،پاکستان کا ایٹمی پروگرام ملکی سالمیت کے اداروں کے ہاتھوں میں محفوظ تھا، ہے اور محفوظ رہے گا،ہمیں اپنے ملک کے سلامتی کے اداروں پر مکمل یقین اور اعتماد ہے،پاک افواج ملک خداداد کی سلامتی کی ضامن ہیں،پاکستان کو بنانا ریپبلک بنانے کی عمران خان کی مذموم کوشش کبھی کامیاب نہیں ہوگی۔ انہوں نے کہا میں حکومت پاکستان، قومی سلامتی کے اداروں اور عدلیہ سے عمران خان کے بیان پر ایکشن لینے کے لئے اپیل کرتا ہوں، کسی بیرونی ایجنڈے یا سازش پر کام کرنے والے شخص پر فی الفور پابندی ہونی چاہیے،عمران نیازی ابھی قومی سلامتی کے درپے ہے اس کی زبان بند کرنا ہو گی، خاکم بدہن یہ شخص ملک توڑ کر رکھ دے گا۔

موضوعات:راجہ ریاض