حیدرآباد(این این آئی)ڈی ایس پی قاسم آباد کے قتل کی سی سی ٹی وی فوٹیج منظرعام پر آگئی ہے ۔سی سی ٹی وی فوٹیج میں دیکھا جاسکتا ہے کہ آصف چانڈیو نے ڈی ایس پی قاسم آباد فیض محمد دایو کو قتل کرنے کے بعد ان کے ڈرائیور کو بھی مارنے کی کوشش کی اور اس پر بھی فائرنگ کی مگر ڈرائیور
غلام قادر وہاں سے بھاگ کر اپنی جان بچانے میں کامیاب رہا۔واضح رہے کہ 3 فروری کو حیدرآباد کے علاقے پکوڑا چوک کے قریب ڈی ایس پی قاسم آباد فیض محمد دایو کو گن مین نے گولی مار کر قتل کردیا تھا جبکہ ملزم کو جائے حادثے سے گرفتار کرلیا گیا تھا۔ملزم نے پولیس کو دیے گئے بیان میں بتایا کہ میرے ساتھ کافی عرصے سے زیادتیاں ہورہی تھیں، مجھے دبائو میں رکھا جاتا تھا تنگ آگیا تھا اسی لیے یہ قدم اٹھایا۔پولیس کے مطابق ڈی ایس پی سول کپڑوں میں پولیس موبائل میں سوار تھے اس دوران سپاہی آصف چانڈیو سے ان کی تلخ کلامی ہوئی جس پر سپاہی نے طیش میں آکر فائرنگ کردی تھی۔ڈی ایس پی فیض محمد دایو کو فوری طور پر سول اسپتال منتقل کیا گیا جہاں ڈاکٹروں نے ان کی موت کی تصدیق کی تھی۔ڈی ایس پی فیض محمد دایو تھارو شاہ کے رہائشی تھے جبکہ گن مین آصف چانڈیو دادو کا رہائشی بتایا جاتا ہے۔
