لاہور( این این آئی)مسلم لیگ (ن)ضلع گجرانوالہ کی اعلی قیادت پر سرکاری زمین پر غیر قانونی قبضہ کرنے پر کروڑوں روپے تاوان عائد کر دیا گیا،لیگی رہنمائوں خرم دستگیر کے والد غلام دستگیر خان ، مدثر قیوم ناہرہ ، مظہر قیوم ناہرہ اور ناہرہ برادران کے عزیز شہباز احمد چٹھہ
پر جرمانہ عائد کیا گیا۔ اینٹی کرپشن حکام کے مطابق انکوائریوں کے بعد متعلقہ محکموں کی طرف سے بھاری جرمانوں کی وصولی کے لئے مراسلے جاری کر دیئے گئے ہیں۔ ذرائع کے مطابق جرمانوں کی عدم ادائیگی کی صورت میں جائیداد کی نیلامی اور گرفتاریوں کا عمل شروع کیا جائے گا ۔ ذرائع کے مطابق محکمہ ہائی وے کی جانب سے سابق ایم این اے غلام دستگیر خان کو 2 کروڑ 51 لاکھ تاوان کا نوٹس جاری کیا گیا ہے ،غلام دستگیر خان کو اینٹی کرپشن کی انکوائری کی بنیاد پر تاوان کا نوٹس جاری کیا گیا۔تاوان کا نوٹس ڈسٹرکٹ رینٹ اسیسمنٹ کمیٹی کی منظوری کے بعد جاری ہوا۔ ذرائع کے مطابق غلام دستگیر خان نے محکمہ ہائی وے کی زمین پر غیر قانونی پیٹرول پمپ تعمیر کیا تھا جسے پہلے ہی گرا دیا گیا ۔ مدثر قیوم ناہرہ اور مظہر قیوم ناہرہ کو 6 لاکھ 36 ہزار تاوان کا نوٹس جاری کیا گیا ہے ،تاوان کا نوٹس سرکاری زمین پر قبضہ کرنے کی وجہ سے اینٹی کرپشن کی انکوائری کے بعد جاری کیا گیا ۔ ناہرہ برادران کے عزیز شہباز احمد چٹھہ کو 417 کنال سرکاری زمین پر قبضہ کرنے پر 2 کروڑ 40 لاکھ تاوان کا نوٹس جاری کیا گیا۔
