کراچی(این این آئی) خلیج بنگال میں سمندری طوفان گلاب کا زور ٹوٹ گیا، ساتھ ہی ایک اور سمندری طوفان شاہین کے بننے کا خدشہ پیدا ہو گیاسمندری طوفان گلاب بھارتی ریاستوں اڑیسہ، آندھرا پردیش اور گجرات سے ٹکرانے کے بعد عمان کی طرف مڑ گیا ہے۔ طوفان سے بھارت کے ساحلی علاقوں میں موسلادھار بارش ہوئی اور تین افراد ہلاک ہوئے۔سمندری طوفان سے اڑیسہ،

آندھرا پردیش اور گجرات کے کئی شہروں میں موسلادھار بارشیں ہوئیں۔ طوفان سے مزید دور روز تک بھارت اور پاکستان کے ساحلی علاقوں میں بارش کی پیش گوئی کی گئی ہے۔بھارتی محکمہ موسمیات کے مطابق گلاب سے بحیرہ عرب میں ایک اور سمندری طوفان کے جنم لینے کا خدشہ ہے۔ سمندری طوفان شاہین جمعرات کو بننے کا امکان ہے۔ اس طوفان کو شاہین نام قطر کی طرف سے دیا گیا ہے۔واضح رہے کہ خلیج بنگال میں بننے والے طوفان کو گلاب کانام پاکستان کی جانب سے دیا گیا تھا۔بھارتی ماہرِ موسمیات کے مطابق خلیجِ بنگال میں بننے والا سائیکلونک طوفان اپنی نوعیت کی نایاب موسمیاتی سرگرمی تھا۔ عمومی طور پر مون سون میں بحیرہ عرب یا خلیجِ بنگال میں سائیکلون نہیں بنا کرتے۔عام طور ستمبر میں بحیرہ عرب اور خلیجِ بنگال میں سائیکلون نہیں بنتے بلکہ اکتوبر اور نومبر میں سائیکلون بنتے ہیں۔دوسری جانب شہر قائد سمیت سندھ کے مختلف اضلاع میں موسلادھار بارش کی پیش گوئی کے پیش ظر حفاظتی اقدامات کیلئے متعلقہ اداروں کو الرٹ جاری کردیا گیا۔تفصیلات کے مطابق سندھ ڈیزازٹر مینجمنٹ اتھارٹی نے کراچی سمیت سندھ کے مختلف اضلاع میں موسلادھار بارش کی پیش گوئی کے پیش نظر بارشوں کی تباہ کاریوں سے بچنے اور حفاظتی اقدامات کرنے کے لیے متعلقہ اداروں کو الرٹ جاری کردیاہے۔پی ڈی ایم اے کی جانب سے مراسلے میں کہا گیا ہے کہ متعلقہ ادارے اپنے وسائل تیار رکھیں اور سڑکوں پر مشینری اور عملے کے ساتھ موجود رہیں ، جن علاقوں میں اربن فلڈنگ کا خطرہ ہے وہاں پیشگی انتظامات کیے جائیں ،انسانی جان اور املاک کی حفاظت کے لیے تمام وسائل بروئے کار لائے جائیں۔عمرکوٹ، سانگھڑ، ٹھٹھہ، بدین، حیدرآباد، ٹنڈو الہ یار، ٹنڈو محمد خان، شہید بینظیر آباد، ضلع دادو اور کراچی ڈویژن میں گرج چمک کے ساتھ موسلادھار بارش جبکہ سکھر لاڑکانہ، اور جیکب آباد میں بھی 30 ستمبر تک کہیں کہیں بارش کا امکان ہے۔دوسری جان محکمہ فشری نے ماہی گیروں کو سمندری طوفان کا الرٹ جاری کرتے ہوئے ماہی گیروں کو گہرے سمندر میں نہ جانے کی ہدایت کی ہے۔محکمہ فشریزکے مطابق محکمہ موسمیات کے مطابق سمندرمیں طوفان بن رہا ہے، سمندر میں 2 اکتوبر تک تیز ہوائیں چلنے کے قوی امکانات ہیں، ماہی گیری 2 اکتوبر تک ماہی گیر گہرے سمندرمیں نہیں جائیں۔